सेनां क्येकूगु गोलीं लाना स्वम्ह सित
अज्ञात पुचलं क्येकूगु गोलीं लाना युथफोर्सया नेता घाःपाः
सुर्खेत व बर्दियाया सिमानाय् लाःगु हरिहरपुर गाजापानीलय् गस्तीइ वनाच्वंगु सेनां क्येकूगु गोलीं लाना स्वम्ह मिसा सिगु दु । गोलीं लाना सुर्खेत हरिहरपुर गाविस-२या स्वीन्यादँया देवीसरा विक, स्वीस्वदँया अमृता विक व झिंनिदँया चन्द्रकलाम विक सिगु दु ।
बर्दिया राष्ट्रिय निकुञ्ज सुरक्षार्थ च्वनाच्वंपिं सेनाया छपुचलं छाय् गोली क्येकूगु खँ सिके मफुनीगु खँ धाःगु दु । निकुञ्जपाखें न्याघौ पैदल दूरीलय् दुगु उगु क्षेत्रय् प्रहरी वनाः आ: अनुसन्धान न्ह्याकूगु दु । घटनास्थलय् स्वपू नाल भरुवा बन्दूक, प्यंगू राउण्ड गोली व निगू बट्टा बारुद लुगु खँ नं बर्दिया प्रहरीं ज्याकूथीं धाःगु दु ।
उखे अज्ञात पुचलं क्येकूगु गोलीं लाना युथफोर्स मोरङया संयोजक परशुराम बस्नेत व वया ग्वाहालिमी परशुराम राई घाःपाः जूगु दु । विराटनगरया वडा नं १५य् दुगु जनपथ त्वाःलय् बिहीवाः सनिलय् खुतात्याः इलय् स्पलेण्डर मोटरसाइकलय् वःपिं निम्ह अज्ञात पुचलं उमित गोलीं क्येकूगु खँ प्रहरीं धाःगु दु । घाःपाः जूपिंत विराटनगरया न्यूरो अस्पतालय् वासः याकात:गु दु ।
