'लडाकुतय् तथ्यांक गोप्य हे जुइ'
पास्कों लडाकु शिविरया निरीक्षण
राष्ट्रसंघीय उपमहासचिव बी लिन पास्कों माओवादी लडाकुतय् तथ्यांक अनमिन नाप गोप्य हे जुइगु खँ धयादीगु दु । वय्कलं शान्ति सम्झौताया इलय् निगूलिं पक्षं तथ्यांक गोप्य तयेगु विषययात स्वीकार याःगु नं धयादिल ।
बिहीवाः येँ परराष्ट्र मामला अध्ययन केन्द्रं याःगु छगू ज्याझ्वलय् न्ववानादिसें वय्कलं सरकार व माओवादी दथुइ न्हापा जूगु सहमति कार्यान्वयन जुसाः जक अनमिनं निष्पक्ष ज्या यायेफइगु धयादिल । शान्ति प्रकृयाया प्रति इमान्दार जुयाः थःगु प्रतिबद्धताया सम्मान यायेत सम्बन्धित पक्षयात वय्कलं इनाप यानादिल ।
सरकारं माओवादी लडाकुया लिप्पांगु तथ्यांक उपलब्ध मयाकूगु बारे अनमिनया भूमिकाया बारे सरकारं न्ह्यसः थनाच्वंगु इलय् वय्कलं थ्व खँ धयादीगु खः ।
अथेहे येँ जूगु मेगू छगू ज्याझ्वलय् न्ववानादिसें पास्कों दलतय्सं थःगु कमीकमजोरी सुस्केत अनमिनयात द्वपं बियाच्वंगु धयादिल । वय्कलं दलतय् अकर्मण्यताया कारणं अनमिनयात द्वपं बीगु ज्या जुयाच्वंगु धयादिसें अनमिनयात द्वपं बीगु अर्थहीन व हास्यास्पद जूगु टिप्पणी यानादिल ।
नेपाली नीति अध्ययन प्रतिष्ठानं याःगु अर्न्तक्रियाय् पास्कों अनमिनया जिम्मेवारीयात कयाः विवाद यानाच्वंसाः सुराक्षा परिषदं अनमिनया म्याद मतनीगु तकं धयादिल ।
पास्कों लडाकु शिविरया निरीक्षण
नेपाः भ्रमणय् दीम्ह राष्ट्रसंघीय राजनीतिक मामिला सम्बधन्धी उपमहासचिव बी लिन पास्कों चितवनय् दुगु शक्तिखोरय् च्वंगु माओवादीया स्वंगू डिभिजनया शिविर निरीक्षण यानादीगु दु । माओवादी जनसेनाया हेडक्वाटर धकाः म्हस्यूगु शक्तिखोर शिविरय् वय्कलं लडाकुतय् स्थिति बारे अध्ययन यायेगु नापं शिविर निरिक्षण यानादीगु खः । उगु इलय् वय्कलं लडाकुतय् डिभिजन प्रमुख व शिविरय् खतेजूपिं लडाकुत नाप खँल्हाबंला यानादीगु खः ।
