अनमिन बारे माओवादी व गैर माओवादी दथुइ विवाद
नेपाः स्थित राष्ट्रसंघीय मिसन (अनमिन) व सरकार दथुइ विवाद जुयाच्वंगु इलय् हे माओवादी व गैर माओवादी दलत दथुइ अनमिनया भूमिका बारे विवाद जूगु दु ।
रिपोटर्स क्लबं बिहीवाः येँ याःगु छगू साक्षात्कार ज्याझ्वलय् माओवादी नेता अग्नी साप्कोटां अनमिनं नेपाःया शान्ति प्रृकयाय् सकारात्मक भूमिका म्हिता: च्वंसां सरकारं अनावश्यक रुपं विवादय् ह्येगू ज्या यानाच्वंगु द्वपं बियादिल । नापं वय्कलं थःपिं युद्ध पाखें तापानाच्वंगु तर युद्ध चाहे जूपिंसं माओवादीयात अझ नं युद्धय् हे घ्वानाछ्वयेगु ज्या यानाच्वंगु धयादिल ।
ज्याझ्वलय् कांग्रेस नेता डा. नारायण खड्कां अनमिनं माओवादीया पक्षय् कयाच्वंगु धयादिसें अनमिनं सरकारयात ग्वाहालि मयाःगुलिं समस्या पिहांवःगु धयादिल । एमाले नेता प्रकाश ज्वालां न्हापा अनमिनं सकारात्मक भूमिका म्हितुगु खःसां आः वयाः अनमिनया भूमिका उलि सकारात्मक मजूगु टिप्पणी यानादिल । वय्कलं सरकारं माओवादी लडाकुया विवरण फ्वंगु इलय् अनमिनं बीत अस्वीकार यायेवं थ्व समस्या ब्वंगु दावी यानादिल ।
अथेहे सद्भावनाया नेता अनिल झां अनमिनया भूमिका प्रति न्ह्यसः थनादिसें अनमिनं माओवादीया पक्ष काःगु द्वपं बियादिल ।
