सरकार परिवर्तन यायेगु आवश्यकता मदु : केसी
नेपाली कांग्रेसया प्रवक्ता अर्जुननरसिंह केसीं कांग्रेस वर्तमान सरकार परिवर्तनया पक्षय् मदुगु खँ धयादीगु दु । वय्कलं दक्वं दलतय् सहकार्य व सहमतिया आधारय् गठन जूगु वर्तमान सरकारं हे देय्यात न्हूगु आयाम बीगु दाबी नं यानादिल ।
रौतहटया चन्द्रनिगाहपुरय् बिहीवाः सेभ द इनभाइरोमेन्ट अफ नेपालया झिंन्याक्वःगु साधारण सभाया लसताय् ग्वसाःग्वःगु प्रतिभा सम्मान ज्याझ्वलय् न्ववानादिसें नेता केसीं दलत सरकार परिवर्तन यायेगु स्वयां संविधान निर्माण यायेगु पाखे गम्भीर जुइमाःगु धयादिल । वय्कलं आःया ई सरकार निर्माण व क्वःथलेगु मजुसें दलत दथुइ सहकार्य यानाः वनेगु ई जूगु धयादिल । वय्कलं दलत दथुइ सहकार्य मजुसाः इलय् हे संविधान जारी यायेमफइगु धयादिल ।
नेता केसीं माओवादीं सेना समायोजनया ज्याय् ग्वाहाली मयाःगु प्रति असन्तुष्टि प्वंकादिसें माओवादीं ल्वाभः व जनसेनाया आडय् न्हूगु संविधान जारी यायेमबीगु व सत्ता कब्जा यायेगु रणनीतिक दयेकाः च्वंगु दाबी यानादिल । ज्याझ्वलय् वय्कलं अनमिनया भूमिका प्रति नं असन्तुष्टि प्वंकादीगु खः ।
