चचा म्येँ व प्याखं प्रशिक्षण
यल (सन्ध्या टाइम्स)/श्रीबच्छ महाविहारया ग्वसालय् वंगु भाद्र ११ गतेनिसें न्ह्यानाच्वंगु चचा म्येँ व चचा प्याखंया प्रशिक्षण ज्याझ्वः नकतिनि क्वचाल। श्रीबच्छ महाविहार सुधार समितिया नायः हेरारत्न शाक्यया सभापतित्वय् जूगु समापन ज्याझ्वलय् उगु प्रशिक्षण ज्याझ्वलय् ब्वति कयादीपिं सकलें सहभागीपिंत दसिपौ व गुरुपिंत हनापौ लःल्हायेगु ज्या नं जूगु खः। चचा म्ये व प्याखं गुरु नानीबाबु वज्राचार्यं स्यनादीगु खः ।
ज्याझ्वलय् समितिया छ्यांज्ये इन्द्रमुनी वज्राचार्यं विहारपाखें याना वयाच्वंगु ज्याझ्वः बारे कनादीगु खःसा चचा म्येँ व प्याखंया निर्देशक रिद्धि बहादुर वज्राचार्य मूपाहां कथं ब्वति कयादीगु खः ।
ज्याझ्वलय् बौद्ध विद्वान प्रा. डा. वज्रराज शाक्य व सूर्यमान वज्राचार्यपिंसं चचा म्येँ व प्याखंया महत्व बारे कनादीगु खःसा बौद्ध संघ यलया नायः बाबुराजा वज्राचार्य व प्रशिक्षार्थी बुद्धरत्न शाक्य 'क्वाथबहाल' पाखें नं नुगःखँ प्वंकादीगु खः।
नेवाः बौद्ध संस्कृति उत्थान यायेगु तातुनाः न्ह्याःगु उगु ज्याझ्वलय् १५ गू बाहाः, १२ गू बही व थीथी बौद्ध संघ संस्था व बौद्ध विद्वानपिंसं ब्वति काःगु खः। प्रशिक्षण ज्याझ्वः न्हय्ला तक न्ह्याःगु खः ।
