शारदा क्याम्पसया झिंगुदँ
ख्वप (सन्ध्या टाइम्स)/शारदा क्याम्पसया झिंगुदँ बुदिं व सांस्कृतिक ज्याझ्वः क्याम्पसया ख्यलय् नेमकिपाया अध्यक्ष नारायणमान बिजुक्छेँ रोहितं उलेज्या यानादिल। ज्याझ्वलय् थीथी ब्यक्तित्वतय्त हनेज्या यानादिसें वय्कलं शिक्षाया लिच्वः स्वयां गुणय् ध्यान तयेमाःगु खँ कनादिल। दाता गोपीकृष्ण प्रजापतियात दोसल्लां न्ययेकाः हनेज्या जूगु उगु ज्याझ्वलय् सिद्धिगणेश साकोसयात नं लुमन्ति चिं लःल्हाःगु खः ।
विद्यालय ब्यवस्थापन समितिया निर्देशक प्रा. पृथुचरण बैद्य, त्रिविवि शिक्षा शास्त्र अध्ययन संस्थानया डीन प्रा. डा. प्रकाशमान श्रेष्ठ, सेरिडया अध्यक्ष अरविन्द्रलाल भोमि, त्रिविविया परीक्षा नियन्त्रक दयामान कर्माचार्य, त्रिविवि शिक्षा संकायया डीन डा. रामकृष्ण महर्जन, त्रिविवि अनुदान आयोगया प्रशासकीय प्रमुख सुवाशचन्द्र ढुंगेल, विद्यार्थी प्रतिनिधि सरिता ढकाल व क्याम्पसया प्राचार्य कृष्णगोपाल कुसीपिंसं न्ववानादीगु खः ।
