मेगासिटी निर्माण निंतिं पूर्वाधार हयेगु तयारी
येँ (सन्ध्या टाइम्स)/सरकारं झिगू 'मेगासिटी' निर्माणया निंतिं पूर्वाधार निर्माणया तयारी यानाच्वंगु जानकारी अर्थमन्त्री सुरेन्द्र पाण्डें बियादीगु दु। नेकपा (एमाले) काभ्रे जिल्लां ग्वसाः ग्वःगु छगू ज्याझ्वलय् न्ववासें थुगु जानकारी बियादीगु खः ।
मन्त्री पाण्डें आधुनिक शहरीकरणया निंतिं मेगासिटीया आवश्यकता जूगु धासें भ्वँत, पन्ति व धौख्यःयात छगू हे शहरया रुपय् हिलाः विकास यायेमाःगु खँ धयादिल। वय्कलं खेतीया निंतिं योग्य जमिनया संरक्षण यायेगुया लिसें शहर विकासया निंतिं माःगु पूर्वाधारया निर्माण यानाः चिचिधंगु शहरयात केन्द्रीकृत याना यंकेगु योजना सरकारं हयेगु नं स्पष्ट यानादिल ।
लिसें उगु ज्याझ्वलय् मन्त्री पाण्डें विद्यामान लोड शेडिङ्गयात म्हो यायेगु निंतिं पहाडी लागाया छगू जिल्लायात छगू हाइड्रो पावरया नीति नं न्ह्यःने हःगु जाकनरी बियादीगु दु। यदि देय् व जनताया आर्थिक विकास यायेगु खःसा धइगु जूसा पर्यटन, व्यापार व कृषि क्षेत्रयात विशेष ध्यान बिया वनेमाःगु खँय् बः बियादीगु दु ।
काभ्रे जिल्लाया सुख्खा क्षेत्र कथं कयातःगु पाँचखाल व भकुण्डेबेशीइ डिपबोरिङ्गया प्रविधि छ्यलाः सिचाईया वैकल्पिक व्यवस्थाय् ग्वाहालि यायेत सरकार तयार दुगु नं वय्कलं आवश्वासन बियादीगु दु ।
अथे हे वय्कलं आः वइगु आर्थिक दँया बजेटय् ख्वपया सूर्य विनायक निसें धौख्यः तक खुगू लेनया सतक विस्तार यायेत निंतिं बजेट विनियोजन यायेगु नं प्रतिवद्धता प्वंकादीगु दु ।
