झिदँया जनयुद्धया कारणं हे थौंया ह्यूपा सम्भव : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' झिदँया जनयुद्धया कारणं हे वर्तमान ह्यूपा सम्भव जूगु दाबी यानादीगु दु । वय्कलं वर्गीय, जातीय, क्षेत्रीय व लैंगिक जागरणय् प्रमुख योगदान जनयुद्धं हे म्हितुगु धयादिल ।
थीथी पार्टी परित्याग यानाः माओवादीइ वःपिंत लसकुस यायेत पार्टीया मू ज्याकू पेरिस डाँडाय् बिहीवाः ग्वसाःग्वःगु ज्याझ्वलय् न्ववानादिसें वय्कलं न्हूगु संविधानय् दक्वः ल्यूने लाःगु व उत्पीडित समुदायया अधिकार सुनिश्चितताया निंतिं माओवादीं सतक व सदनं संघर्ष यानाच्वंगु धयादिल । वय्कलं छुं यथास्थितिवादी व परम्पारावादी शक्तित जनताया पक्षय् संविधान निर्माण मजुइमाः धकाः लगेजुयाच्वंगु धयादिसें उकीप्रति माओवादी सचेत जुयाः संघर्ष यानाच्वंगु धयादिल ।
माओवादी अध्यक्ष प्रचण्डं संक्रमणकालयात सकारात्मक ढंगं देय् व जनताया पक्षय् छय्लेमाःगु आःया प्रमगु हाथ्या जूगु धयादिल । वर्तमान राजनीतिक परिस्थिति तसकं संवेदनशील जूगुलिं दकलय् तःधंगु पार्टीया नातां शान्ति प्रकृया व संविधान निर्माणयात निष्कर्षय् थ्यंकेत माओवादीया महत्वपूर्ण जिम्मेवारी दुगु वय्कलं धयादिल ।
