नेपाः पार्टीपाखें गाडी बहिष्कार
येँ (सन्ध्या टाइम्स)/थःगु सत्ता टिके यायेत वर्तमान सरकारं संसदय् दुथ्याःगु २५ गुलिं हे दलया नेतातय्त बिउगु गाडी सुविधा नेपाः राष्ट्रिय पार्टीं बहिष्कार याइगु जूगु दु ।
आर्थिक रुपं देय् ताथ जुयाच्वंगु इलय् राष्ट्रिय धुकूया हन्ताः जुइ कथं सरकारं बिउगु थ्व सुविधा उपभोग यायेगु नैतिक रुपं नं पाय्छि मखु धासें पार्टीपाखें उकियात बहिष्कार यायेगु निर्णय याःगु खः ।
पार्टी अध्यक्ष डा. केशवमान शाक्यं 'सन्ध्या टाइम्स'लिसे खँ ल्हासें धयादिल, 'थ्व वर्तमान सरकार टिके यायेत लोभीतय्त इना बिउगु सुविधा खः ।'
अथे हे नेमकिपाया अध्यक्ष नारायणमान बिजुक्छे 'रोहितं' नं सरकारं बिउगु थ्व गाडी सुविधा मकायेगु खँ कनादीगु दु। म्हीग छगू ज्याझ्वलय् न्ववासें वय्कलं थज्याःगु फजुल खर्चयात थःपिंसं न्हापांनिसें विरोध याना वयाच्वनागु जूगुलिं अनावश्यक रुपं बिउगु थज्याःगु सुविधायात थपिंसं बहिष्कार यायेगु खँ वय्कलं धयादीगु खः ।
भाजु रोहितं संविधानसभाय् छन्हु हे उपस्थित मजुसे भत्ता नइपिं सभासद्तय् नं विरोध यानादिल।
सरकारं संविधानसभाय् दुथ्याःगु २५ गुलिं दलयात गाडी सुविधा बीगु धकाः निर्णय यायेसातकि हे गुलिखे दलया नेतात संविधानसभा ज्याकुथी वनाः थःपिनि भागया गाडी वल ला थें धकाः बुझे याः वनाच्वंगु खँ अनया कर्मचारीतय्सं धाःगु दु। थ्व गाडी सुविधा बीसातकि उकिया इन्धन व चालक खर्च कथं लय् २५,००० तका थप खर्च नं बी ।
