येँया सुरक्षा व्यवस्था कडा
येँ (सन्ध्या टाइम्स)/स्वतन्त्र तिब्बत आन्दोलनया ५१ दँ पूवंगु लसताय् लाकाः तिब्बतीतय्सं येँय् प्रदर्शन यायेगु तयारी याःगु कारणं सरकारं राजधानी येँया सुरक्षा व्यवस्था कडा याःगु दु ।
थ्व लसताय् तिब्बतीतय्सं चीन विरोधी प्रदर्शन यायेफुगु खँयात ध्यानय् तयाः थाय्थासय् जनपथ व सशस्त्र प्रहरी परिचालन यानातःगु दु। विशेष यानाः बालुवाटारया चिनियाँ दुतावास व हात्तिसारया काउन्सिलरया ज्याकू जःखः यक्व हे ल्याखय् सुरक्षाकर्मी तैनाथ यानातःगु दु ।
स्वतन्त्र तिब्बतया माग यानाः नेपाः वयाच्वंपिं तिब्बतीतय्सं यलया जावलाख्यः, येँया स्वयम्भु व बौद्धया थीथी थासय् प्रदर्शन यायेगु तयारी यानाच्वंगु खँ धाःगु दु। अथे हे थीथी बौद्ध स्कूलया विद्यार्थीतय्त नं स्वयम्भुया सामदेली गुम्बाय् मुंकाः शान्तिया प्रार्थना याकीगु ज्याझ्वः दयेकातःगु दु।
सन् १९४९ स तिब्बतयात चीनं थःगु अधिनस्थ दयेकेधुंकाः भारतय् निर्वासित धर्मगुरु दलाई लामां स्वतन्त्र तिब्बतया माग यानाः आन्दोलन याना वयाच्वंगु खः। नेपालय् प्रदर्शन यायेत भारतं नं तिब्बतीत वयाच्वंगु खँ धाःगु दु ।
