सत्यमोहनया स्वक्वःगु ज्याःजंक्व
नेपालभाषाया नांजाःम्ह च्वमि लिसें देय्या हे विख्यात संस्कृतिविद् भाजु सत्यमोहन जोशीया स्वक्वःगु ज्याःजंक्व याइगु जूगु दु । नेवाः संस्कारय् मनू ८८ दँ ८ ला व ८ न्हु दत कि स्वक्वःगु ज्याःजंक्व याइगु चलन दु ।८८ दँ दुम्ह भाजु जोशीया थ्वहे वइगु सोमवाः कुन्हु स्वक्वःगु ज्याःजंक्वया ज्याझवः दु । वय्कःया काय म्ह्याय् व छय्पिं जानाः यलय् थ्व स्वक्वःगु ज्याः जंक्व यायेत्यंगु खः । भाजु जोशीया जहान मय्जु राधादेवी जोशी नं जीवित हे दनि । स्वक्वःगु ज्याःजंक्वय् मनूयात छेँया झयालं तुं स्वाहाने तयाः थत यंकेगु ज्या याइगु खः । खय् भासं थुकियात महारथारोहण धायेगु याः ।
थौंकन्हय् नेपालभाषा एकेदमिया चान्सलर जुया च्वनादीम्ह भाजु जोशी ८८ दँ दयेधुंकलं नं अझं वैंश वंम्ह थें धाःसा मच्वंनि । वय्कः थौंकन्हय् नं यलं येँय् तक न्यासि हे वयेफुनि । वय्कःया थ्व तन्दुरुष्टी खनाः सकलें अजूचाः । आः तक छुं नं कथंया नियमित वासः नये म्वाःनिम्ह भाजु जोशी थौं तकं सामाजिक ज्याखँय् उतिकं सक्रिय तिनि ।
