इलय् हे संविधान जारी यायेगु नीन्यागू दलया प्रतिबद्धता
संविधान सभां क्वःछिनातःगु इलय् हे न्हूगु संविधान जारी यायेत संविधानसभाय् दुथ्याःगु नीन्यागूलिं दलया नेतातय्सं प्रतिबद्धता प्वंकूगु दु ।
संविधानसभा अर्न्तगत संवैधानिक समितिया ज्या ठप्प जुइवं मंगलवाः च्वंगु नीन्यागूलिं दलया बैठकय् शीर्ष नेतातय्सं इलय् हे संविधान जारी यायेगु प्रतिबद्धता प्वंकूगु खः । बैठकय् प्रधानमन्त्री माधवकुमार नेपालं जेठ १४ गते न्ह्यः शान्ति प्रकृयायात पूवंकाः संविधान च्वये ल्यंदनीगु विषयलय् सहमति यानाः इलय् हे संविधान जारी यायेफइगु धयादिल ।
माओवादी अध्यक्ष पुष्पकमल दाहाल 'प्रचण्डं' जनतया म्यान्डेट जेठ १४ गते हे संविधान जारी यायेगु जूगुलिं संविधान दुनेया विविध पक्षय् सहलह यायेत दलत गम्भीर जुइमाःगु धयादिल । नापं वय्कलं देय्या शासकीय स्वरुप व राज्य पुनसंरचनाया विषयलय् अप्व सहलह यायेमाःगु नं धयादिल ।
अथेहे संवैधानिक समितिया सभापति निलाम्बर आचार्यं संविधान जारी यायेत च्यय्न्हू ल्यं दनीगु धयादिसें दलत दथुइ दुगु मतभिन्नता चीकेत दलया नेतात हे लगेजुइमाःगु धयादिल । वय्कलं दलत दुनेया असहमति चीकेफुसाः संविधान इलय् हे जारी यायेफइगु धयादिल । नापं वय्कलं संविधानसभा अर्न्तगतया निगू विषयगत समिति बाहेक मेमेगू समितिया मस्यौदा मवनीगुलिं ज्या यायेत थाकूगु धयादिल ।
बैठकय् प्रधानमन्त्री नेपाल, माओवादी अध्यक्ष प्रचण्ड, कांग्रेस उपसभापति प्रकाशमान सिंह, एमाले अध्यक्ष झलनाथ खनाल लगायत नीन्यागूलिं दलया शीर्ष नेतातय् उपस्थिति दुगु खः ।
