विशेष सुरक्षा योजनाय् पुर्नवालोकन : पोखरेल
सूचना व संचार मन्त्री शंकर पोखरेलं संचार माध्यमय् जुयाच्वंगु आक्रमण प्रति सरकार गम्भीर जूगु धयादिसें जनकपुरया संचार उद्यमी अरुण सिंहानियाया हत्या लिपाः सरकार थप सतर्क जूग व विशेष सुरक्षा पुर्नवालोकन यायेगु खँ धयादीगु दु ।
संचार माध्यमय् अप्वयाच्वंगु अपराधीक गतिविधिया बारे मंगलवाः सविधानसभाया विकास समितिलय् सहलह यानादिसें मन्त्री पोखरेलं संचार माध्यमय् अप्वंच्वंगु असुरक्षा व थीथी कथंया समस्याया निंतिं संचार मन्त्रयालय् अर्न्तगत सहसचिवया संयोजनय् संचार डेस्क स्थापना यानागु कनादिल ।
वय्कलं संचार मध्यमय् जुयाच्वंगु हमलाय् अप्व थें मोबाइल फोन छ्यलेगु ज्या जूगु धयादिसें मोबाइल फोनकर्तातय् पूर्ण विवरण कायेत सिम कार्ड कम्पनीतय्त इनाप यानादीगु दु । नापं वय्कलं अज्याःगु विवरण मतसाः कम्पनीया लाइसन्स नं खारेज जुइफइगु खँ धयादिल ।
अथेहे मन्त्री पोखरेलं संरचारया ज्याखँ स्वयां पिनेया ज्याखँया कारणं संचार उद्यमीतय् आक्रमण जुयाच्वंगु द्वपं बियादिल । वय्कलं संरचार गृहत संचारया ज्याखँय् जक लगे जुसाः थंज्याःगु आपराधीक घटनात म्हो जुइगु धयादिल ।
सरकारया प्रवक्ता नापं जुयादीम्ह पोखरेलं संचार माध्यमं अपराधयात प्रचारय् हइगु व अज्याःगु घटनायात आधार दयेकाः सरकारयात द्वपं बिगु ज्या जुयाच्वंगु धयादिल । वय्कलं अपराधीत विरुद्ध छप्पँ जुइमाःगु खँय् बः बियादिसें अपराधीतय्सं सरकारया मनोबल क्वःकायेत थंज्याःगु ज्या यानाच्वंगु धयादिल ।
