राज्य पुनर्संरचना आयोग बारे विवाद
येँ (सन्ध्या टाइम्स)/संविधानसभाया राज्य पुनर्संरचना नापं राज्य शक्ति बाँडफाँड समितिपाखें नेवाः प्रदेश लगायत झिंप्यंगू प्रदेशया अवधारणायात बहुमतं पारित याना छ्वये धुंकूगु अवस्थाय् आः हाकनं राज्यपुनर्संरचना आयोगपाखें ज्या याकेगु या मयाकेगु धइगु खँयात कयाः राजनीतिक दलया नेतातय्सं थःथःगु अडान तयाच्वंगु अवस्थाय् आः वयाः उगु आयोगयात पूर्णता बीगु तर आयोगं प्राविधिक पक्षयात जक कयाः ज्या याके बीगु निंतिं नेतातय् दथुइ सहलह जुयाच्वंगु सीदुगु दु ।
लिपांगु इलय् वयाः राजनीतिक गतिरोध अन्त्यया निंतिं धकाः दयेकूगु उच्चस्तरीय राजनीतिक संयन्त्रय् तकं राज्य पुनर्संरचनाया सवालय् आयोग दयेकाः हाकनं ज्या याके बीगु ला कि मबीगु धइगु विषयात कयाः दलया नेतातय् दथुइ बिवाद ब्वलंगु कारणं संयन्त्रया मुँज्याय् तकं समस्या ब्वलंगु खः। विशेष यानाः नेपाली कांग्रेसं आयोगयात हाकनं ज्या याके बीमाः धकाः बः बिया वयाच्वंगु दु। एनेकपा (माओवादीं) धाःसा गुगु नं हालतय् उगु आयोगयात हाकनं ज्या याके बी मखु धकाः सः तया वयाच्वंगु खः। उज्वःगु अवस्थाय् उकियात मिलन बिन्दु कथं आयोगयात पूर्णता बीगु तर आयोगयात प्राविधिक पक्षयात जक स्वके बीगु धकाः नेकपा (एमाले) पाखें खँ हयाच्वंगु सीदुगु दु।
आयोगयात हाकनं ज्या न्ह्याके बिल कि जननिर्वाचिततसिबें मनोनितत अधिकार सम्पन्न जूगु थें जुइगु जुयाः सैद्धान्तिक खँय् राज्य पुनर्संरचना समितिपाखें तयारयाःगु खाकायात हे नालाः प्राविधिक पक्षयात कयाः जक स्वकेगु कथंया भाला बीगु नितिं आयोगयात पूर्णता बीमाः धकाः एमाले नेतातय्सं प्रस्ताव तयाच्वंगु सीदुगु दु ।
