मानन्धरतय् स्वयम्भु भ्वय् क्वचाल
येँ (सन्ध्या टाइम्स)/दँय्दसं थें थुगुसी नं देय्न्यंकंया मानन्धरतय् स्वयम्भु भ्वय् तःजिक न्यायेकल। वंगु शनिवाः स्वयम्भु क्वय् प्राकृतिक विज्ञान संग्रहालयया ख्यलय् जूगु उगु भ्वजय् थ्यंमथ्यं निद्वःम्ह मानन्धरतय्सं ब्वति काःगु खः ।
ज्याझ्वलय् मानन्धरतय् देय् थाकुलि न्हूसाः त्वाःया १०१ दँया भाजु इन्द्रनारायण मानन्धर व देय् नकिं दैसाः त्वाःया ९७ दँया नानीमाया मानन्धरयात ख्येंसगं बियाः हनेगु ज्या जूगु खः। अथे हे थुगुसी ज्याःजंक्व यानादीपिं मरुध्वाखाया द्वारिकादेवी मानन्धर व कालिमाटीया रामलाल मानन्धर एवं रामदेवी मानन्धरयात दसिपौ नं लःल्हाःगु खः ।
लिसें थुगुसी इहिपा जूपिं ४३ ज्वः तिपूयात नं संघपाखें दसिपौ लःल्हाःगु खः। अथे हे मानन्धर संघया छेँ धस्वाकेत आर्थिक ग्वाहालि यानादीपिंत हनापौ नं लःल्हाःगु खः।
मानन्धर संघया नायः न्हुछे बहादुर मानन्धरया सभापतित्वय् जूगु उगु ज्याझ्वलय् उपसभापति रत्ननारायण न्हूजवाः साय्मिं लसकुस यानादीगु खःसा कोषाध्यक्ष बद्रीनारायण मानन्धरं सुभाय् देछानादीगु खः। ज्याझ्वलय् न्हय्सः नायः अमोघ नारायण मानन्धर नापं निवर्तमान नायः विष्णुबहादुर मानन्धरपिनि नं उपस्थिति दुगु खः ।
थुगुसीया स्वयम्भु भ्वय् वंतु त्वाः मानन्धर गुथिपाखें याःगु खःसा आकिवंया पाःब्व पाक्व पखुद्यां मानन्धर सनाः खलःयात लःल्हाःगु दु ।
ज्याझ्वलय् न्हूतिपूपिनि दथुइ थीथी कथंया न्ह्यइपुगु कासात नं जूगु खः ।
