संविधान जारी मजूतले हे धर्ना

येँ (सन्ध्या टाइम्स)/ थ्वहे वइगु जेष्ठ १४ गते तकया दुने हे न्हूगु संविधान जारी यायेमाः धइगु माग यासें आवंलि नागरिक आन्दोलनया न्ह्यलुवातय्सं आः संविधान जारी मजूतले हे मदिक्क धर्ना च्वनेगु तयारी याःगु दु। नागरिक सत्याग्रह धकाः लोकतन्त्र व शान्तिया निंतिं नागरिक आन्दोलनया आह्वानय् उगु कथं धर्ना च्वनेगु ज्याझ्वः यायेत्यंगु खः ।

थीथी जिल्लाय् सक्रिय जुया वयाच्वंपिं नागरिक आन्दोलनया न्ह्यलुवाःत नं उगु धर्नाय् सहभागी जुइ धाःगु दु। न्हूगु संविधानया निंतिं नागरिकत न्हिया न्हिथं मदिक्क हे धर्ना च्वने फुसा संविधान दयेकीपिं सभासदपिं न्हिछि चछि धर्ना छाय् च्वने मफुत धकाः न्ह्यसः तयेत नापं इलय् हे संविधानया निंतिं दवाव बीत धर्ना च्वनेगु तयारी याःगु। थ्वहे झ्वलय् उगु आन्दोलनं थौं संविधानसभाया भवन न्ह्यःने नागरिक खबरदारी सभा यायेगु तयारी यानाच्वंगु दु। थौंया खबरदारी सभां नागरिक आन्दोलनया न्हूगु चरणया खबरदारी ज्याझ्वः पित बीगु तयारी यानाच्वंगु दु ।