अवसर दुपिं मिस्तय्सं म्हितेमाःगु भूमिका

दँय्दसं थें थुगुसी नं विश्वन्यंकं मिसा दिवस तःजिक न्यायेकल। थ्व लसताय् नेपालय् नं थीथी ज्याझ्वः यासें मिसा दिवस न्यायेकेगु ज्या जुल। थुगुसी सछिक्वःगु मिसा दिवस न्यायेकूगु जूगुलिं थुकिया बिस्कं महत्व दुगु खनेदु।
सछिदँ न्ह्यः गुगु स्थितिइ मिसा दिवस न्यायेकेगु शुरु जूगु खः, थौंया विश्व उगु अवस्थां गाक्कं न्ह्यःने वनेधुंकूगु दु। थौं विश्वया आपालं देशय् मिस्तय्सं मुक्कं राष्ट्रया नेतृत्व कःघानाः थःगु क्षमता ब्वयाच्वंगु दु। मिस्तय्गु नेतृत्वय् मुलुकं तःधंगु प्रगति नं यानाच्वंगु दु। विश्वया आपालं विकसित मुलुकय् मिस्तय्त नं राजनीतिया सर्वोच्च पद तक थ्यनेगु लुखा चाःगु दुसां नेपाः लगायत मेमेगु गरिब देशय् धाःसा आः तकं अज्याःगु स्थिति वल धायेछिंगु अवस्था मदुनि। नेपाःया खँ ल्हायेगु खःसा वंशया विरासत कथं छुं मिसा नेतृयात अज्याःगु अवसर वःगु खःसां उमिसं उकियात सही ढंगं उपयोग याये मफुगु विडम्बना झीगु न्ह्यःने दु। यदि न्ह्यलुवा नेतृतय्सं अज्याःगु अवसरयात सदुपयोग मयात धाःसा लिपा वइगु पुस्तां अझ मेहनत याये मालीगु खँयात थौंया पुस्तां मथुइकूगु खनेदु। उकिं मिसा अधिकारया नारा जक थ्वयेकेगु मखु, दुगु अवसरयात हरेक मिसाया पक्षय् छ्यलेगु ज्या नं मिसा नेतृतय्सं यायेमाःगु खनेदु। विश्वय् मिस्तय् अवस्थाय् आपालं हिउपाः वयेधुंकूसां नेपाःया सन्दर्भय् सामाजिक, आर्थिक, सांस्कृतिक व मनोवैज्ञनिक रुपं नं मिस्त लिउने हे लानाच्वंगु दनि। उमित न्ह्यःने हयेगु लागिं अवसर ल्हातय् लाःपिं मिस्तय्सं विशेष कुतः यायेमाः। दुगु अवसरयात अन्यया सेवाय् सितिकं छ्वत धाःसा मिसा समानता मात्र नाराया जक विषय जुयाच्वनी ।