ओस्कारय् चातुवात "अवतार"

'द हार्ट लकर' खुगू अवार्ड सहित उत्कृष्ट
पुलांम्ह कलातं बुकल 'अवतार' निर्देशकयात

थुगु दँया दकलय् चर्चित हलिउड फिल्म 'अवतार' ओस्कार सिरपाःया धेंधेंबल्लाखय् धाःसा बांमलाक हे चातुवात। 'टाइटानिक' या निर्देशक जेम्स क्यामरोनं थःगु म्हगसया फिल्म धकाः बय्बय् याःगु 'अवतार' म्हिगः जूगु ओस्कार सिरपाः समारोहय् प्राविधिक ख्यःया मात्र स्वंगू ओस्कार त्याकाः लिहां वये माल ।

उकिया अःखः लिपांगु इलय् वयाः तिनि बुलुहुँ चर्चाय् वःगु 'द हर्ट लकर' धाःसा उत्कृष्ट फिल्मया सिरपाः त्याकेत ताःलाःगु जक मखु उत्कृष्ट निर्देशक सहित खुगू सिरपाः त्याकाः ओस्कार 'कब्जा' यायेत ताःलात। 'द हर्ट लकर' या निर्देशक मय्जु काथरिन बिगलो ओस्कार त्याकूम्ह न्हापांम्ह मिसा निर्देशक खः। अन्तर्राष्ट्रिय मिसा दिवस कुन्हू जूगु ओस्कार समारोहय् मिसाम्ह हे निर्देशकं न्हापांखुसी ओस्कार त्याकाः छगू अजूचायापुगु संयोगया दथुइ इतिहास कायम याःगु दु।
अझ दकलय् रोचक खँ ला छु धायेबलय् 'अवतार'या निर्देशक जेम्स क्यामरुन मय्जु क्याथरिनया पुलांम्ह भाःत नं खः। उकिं थुगुसीया ओस्कार समारोहयात पुलांपिं कलाः-भाःतया 'युद्धभूमि' धकाः नं गुलिस्यां परिभाषित याःगु खः। ओस्कार समारोहय् निम्हं कलाः-भाःत निपलाः स्वपलाः जक तापाक च्वनाच्वंगु खःसा समारोहजःछि ख्याः यानाः नं च्वनाच्वंगु खः ।

क्याथरिनया फिल्म 'द हर्ट लकर' इराक युद्धय् वनाच्वंपिं अमेरिकी सेनाया बाखं खः। तसकं म्हो जक दां खर्च यानाः दयेकूगु थ्व फिल्मं आः तकया हे दकलय् थिकेगु धकाः बय्बय् जुयाच्वंगु 'अवतार'लिसे थीथी विधाय् धेंधेंबल्लाः याःगु खः। ५० करोड डलर खर्च यानाः दयेकूगु 'अवतारं' आः तकया फुक्क हे रेकर्ड त्वाःथसें २५ अर्ब डलर दां कमे यायेधुंकूगु दु ।

थपाय्सकं बय्बय् जूगु थःगु फिल्म थःहे पुलांम्ह कलातं दयेकूगु छगू चीधंगु लो-बजेटया फिल्म न्ह्यःने चातु वायेमाःगु धइगु क्यामरुनया निंतिं धाथें नं पत्याः याये मफइगु यथार्थ जूगु दयेमाः यद्यपि वय्कःया फिल्म 'अवतार' सम्पूर्ण रुपं छगू काल्पनिक बाखं खः ।

थुगुसीया ओस्कारय् मेगु छगू अजूचायापुगु संयोग नायिक सान्द्रा बुलकया सवालय् नं जुल। बुलकयात थुगुसी 'द ब्लाइण्ड साइड' या लागिं उत्कृष्ट नायिकाया ओस्कार बिउगु खः। थ्वयां छन्हु न्ह्यः जक वय्कःयात थुगु दँया दकलय् झुरम्ह नायिका कथं 'रेज्जि एवार्ड' बिउगु खः। छन्हु जक झुर कलाकारया एवार्ड कया वःम्ह सान्द्रा बुलकं वयां कन्हय् कन्हु हे उत्कृष्ट कलाकारया अवार्ड त्याकूगुलिं थःहे अजूचायागु खँ धयादीगु दु ।

ओस्कारया उत्कृष्ट नायकया अवार्ड चाहिं 'क्रेजी हार्ट' या लागिं वरिष्ठ कलाकार जेफ ब्रिजेजं त्याकूगु दु।
हलिउडया कोडाक थिएटरय् जूगु थ्व ज्याझ्वः ८२ क्वःगु ओस्कार समारोह खः ।

थुकी 'अवतारं' उत्कृष्ट सिनेमाटेग्राफी (भाजु माउरो फियोरे), उत्कृष्ट भिजुएल इफेक्ट व उत्कृष्ट कला निर्देशनया सिरपाः नं त्याकूगु खः। 'द हार्ट लकरं' उत्कृष्ट फिल्म लगायत उत्कृष्ट साउण्ड इफेक्ट, सम्पादन, मौलिक पटकथा, निर्देशन व मोशन पिक्चर यानाः खुगू अवार्ड त्याकूगु खः ।

ज्याझ्वलय् उत्कृष्ट चीहाकःगु एनिमेटेड फिल्मया सिरपाः 'लोगोरमा' नांगु फिल्मं काल। १६ मिनेट ताःहाःगु थ्व छगू फिल्म दयेकेत खुदँ बिउगु जुयाच्वन। उत्कृष्ट विदेशी भाषाया अवार्ड अर्जेन्टिनाया फिल्म 'द सेक्रेट इन देयर आइजं' त्याकूगु खः ।

More Stories Like this