सप्तरीइ मि नयाः झिंगुखा छेँ नष्ट
सप्तरीया थीथी निगू थासय् मंगलवाः सुथय् मि नयाः झिंगुखा छेँ नष्ट जूगु दु । मि नयाः छुं मावनीय क्षति मजुसां नीन्यागू लख स्वयां अप्व धनमाल क्षति जूगु दु ।
सप्तरीया सारस्वर गाविस ८ कुशमहार त्वाःया सकलदेव मण्डलया छेँ नःगु मि नापसं च्वंगु विजय मण्डल, श्रीलाल मण्डल, रामदेव मण्डल लगायत झिन्याम्हेसिया छेँ थिउ वनेवं फुक्क जलेजुया नष्ट जूगु खः । अन स्थानीय व सदरमुकाम राजविराज पाखें वंगु बारुण यन्त्रं मि नियन्त्रणय् काःगु खः । सप्तरी प्रहरी ज्याकूया कथं अन मि नयाः नीगू लख धनमाल क्षति जूगु दु ।
अथेहे मंगलवाः सुथय् इटहरी विष्णुपुर ८ गोरगामा त्वाःलय् मि नयाः न्यागू लख बराबरया धनमाल क्षति जूगु दु । स्थानीय तेतर सदाया छेँय् मि नःगु खःसा वयां लिपा वहे मिं लिक्कसं च्वंगु राम सदा व कैलु सदाया प्यखा छेँय् थिउ वनेवं फुक्क च्यानाः नष्ट जूगु खः ।
