'मिसा आन्दोलन दिकेमज्यू'
संविधानसभा अर्न्तगत संवैधानिक समितिया अध्यक्ष नीलाम्बर आचार्यं मिसातय् हकअधिकार पूर्णरुपं सुनिश्चित मजुनीगुलिं मिसा आन्दोलन दिकेमज्यूनीगु खँ धयादीगु दु ।
मोर्डन कन्या मल्टिपल कजेलं सोमवाः येँ याःगु छगू अन्तक्रिया ज्याझ्वलय् न्ववानादिसें वय्कलं मिसा हकअधिकार सहितया आन्दोलन मिसातय् निंतिं जक मजुसें मुक्कं मानव अधिकारया खँ जूगुलिं समाजय् हत्या, हिंसा, अन्याय, अत्याचा व विभेद अन्त्य मजुतल्ले आन्दोलन दिकेमज्यूगु धयादिल । वय्कलं मिसा आन्दोलन पाखें प्राप्त उपलब्धीयात संरक्षण व कार्यान्वयन यासें थप उपलब्धिया निंतिं दक्वं मिसात छप्पँ जुइत इनाप यानादिल ।
'संविधानसभाय् मिसाया हकहित' विषयक अन्तक्रियाय् वय्कलं आः जारी जुइगु संविधानय् मिसा हकहित सुनिश्चित जुइमाःगु खँय् बः बियादिल । वय्कलं कानूनय् दुगु नीति नियम कार्यान्वयन यायेगु निंतिं सरकार गम्भीर जुइमाःगु नं धयादिल ।
