प्याब्सनया अध्यक्षय् खड्का
निजी व आवासीय विद्यालय अर्गनाइजेशन (प्याब्सन)या झिक्वःगु महाधिवेशनं अध्यक्ष पदय् जेम्स स्कुलया राजेश खड्कायात निर्विरोध चयन याःगु दु । मनोनयनया लिप्पांगु ई तक अध्यक्ष पदय् छुनां नं दाबी मयायेवं खड्का निर्विरोध जुयादीगु खः ।
अथेहे प्याब्सनया वरिष्ठ उपाध्यक्षय् सानसाइन उच्च मावि रुपन्देहीया ज्ञानदेव हटुवाल निर्विरोध जुयादीगु दु । उपाध्यक्षया प्रत्यासीत लक्ष्यबहादुर केसी व बीएन शर्मां नां लित कायेवं हटुवाल निर्विरोध जुयादीगु खः ।
अथेहे उपाध्यक्षलय् पूर्वाञ्चलपाखें टीकाराम पुरी, मध्यमाञ्चल पाखें सरोजकुरमा राय, पश्चिमाञ्चल पाखें सुमनगोपाल आचार्य, मध्यपश्चिमाञ्चल पाखें टीकाराम सुवेदी, सुदूरपश्चिम पाखें आरसी यादव व मिसा उपाध्यक्षलय् सानु अमात्य निर्विरोध जूगु दु । अथेहे कोषाध्यक्षय् महेश श्रेष्ठ सहकोषाध्यक्षय् महेन्द्र मास्के निर्विरोध जूगु दु ।
स्वन्हु तक भैरवाहाय् जूगु महाधिवेसनय् खुइस्वंगू जिल्लाया द्वछी स्वयां अप्व प्रतिनिधितय् ब्वति दुगु खःसा निसः पर्यवेक्षकतय् ब्वति दुगु खः ।
