देय् दबूया न्हापांम्ह नायः भक्तिदास श्रेष्ठ मंत
येँ (सन्ध्या टाइम्स)/नेवाः देय् दबूया संस्थापक नायः भाजु भक्तिदास श्रेष्ठ म्हिगः सुथय् मंत। वय्कः ८९ दँ दुम्ह खः। नेपाल संवत् १११६ य् नेवाःतय् राष्ट्रिय संस्था नेवाः देय् दबू नीस्वंबलय् वय्कः उकिया न्हापांम्ह नायः जुयादीगु खः। देय् दबुली वय्कलं १११९ तक नायः जुयादीगु खः।
भाजु श्रेष्ठं साहित्यय् निबन्ध व कविताय् च्वसा न्ह्याकादीगु दु। वय्कलं बौद्ध साहित्यया महत्वपूर्ण कृति पिथनेत नं ग्वाहालि यानादीगु खः ।
वय्कः बुद्ध धर्मया विपस्यना ध्यानया नं विशिष्ट व्यक्तित्व खः। वय्कः वरिष्ठ विपश्यनाचार्य खः। लिसें बौद्ध दर्शनया ज्ञाता नं खः। वय्कलं नेपालय् विपस्यना ध्यानया विस्तार यायेगु ज्याय् तःधंगु योगदान बियादीगु दु ।
वय्कः बौद्ध संस्थातय् राष्ट्रिय संस्था धर्मोदय सभाया पुलांम्ह उपाध्यक्ष नं खः। वय्कःया कार्यकालय् नेवाः देय् दबूयात स्वनिगलं पिने विस्तार यायेगु महत्वपूर्ण ज्या जूगु खः ।
ने.सं. १०४१ आश्विन शुक्ल १३ कुन्हु जन्म जूम्ह वय्कः म्हिगः सुथय् ५ बजे येँया काठमाडौं नर्सिङ होमय् वासः याकुयाकुं मदुगु खः। म्हिगः हे पशुपतिया आर्यघाटय् वय्कःया अन्तिम संस्कार नं जुइधुंकूगु दु ।
मदुम्ह श्रेष्ठया काय स्वम्ह व म्ह्याय् प्यम्ह दी ।
