चैत्र दुने माओवादी व एकीकृत एकीकरण
येँ (सन्ध्या टाइम्स)/एकीकृत नेकपा (माओवादी) व नवराज सुवेदीं नेतृत्व यानादीगु नेकपा (एकीकृत) थ्वहे वइगु चैत्र महिनाया दुने एकता जुइगु जूगु दु ।
वंगु फागुन ५ व ६ गते वुटवलय् जूगु राष्ट्रिय भेलां ल्यःम्ह नेकपा (एकीकृत)या महासचिव नापं पुलांम्ह सांसद नवराज सुवेदीं 'सन्ध्या टाइम्स' लिसे खँ ल्हासें माओवादीलिसे एकता यायेत निगुलिं पार्टीं ब्यागलं ब्यागलं कथं वार्ता पुचः दयेकाः ज्या न्ह्यानाच्वंगु नापं चैत्रया दुने एकता जुइ धयादीगु दु। वय्कलं थःपिनिगु पार्टीया स्वीगुलिं मल्याक जिल्ला कमिटीपाखें छगू हे कम्युनिष्ट केन्द्र दयेकेगु नितिं कुतः जुयाच्वंगुयात थम्हं नेतृत्व याना माओवादीलिसे एकता याये त्यनागु खः धकाः नं धयादिल। थौंकन्हय् नेकपा (एकिकृत) स्वंगू ब्वय् कुचा जुयाच्वंगु दु। छगू पुचःया नेतृत्व सुवेदीं यानादीगु दुसा मेगु पुचःया नेतृत्व रामसिंह श्रीषं यानाच्वंगु दु। अथे हे मेगु छगू पुचःया नेतृत्व भरत लामिछानें यानाच्वंगु दु । थःपिंसं न्हापांनिसें तत्कालीन कार्यनीति नयाँ जनवादी क्रान्तियात नालाः वयाच्वनागु खःसां माओवादीं ज्वनाच्वंगु कार्यनीति जनताया संघीय लोकतान्त्रिक गणतन्त्र नं नयाँ जनवादी क्रान्तिपाखे वनेगु निंतिं हे जूगुलिं एकता यायेगुपाखे न्ह्याः वनाच्वनागु खः धयादिसें नेता सुवेदीं माओवादी दुने हे च्वनाः पथ प्रदर्शक सिद्धान्त मार्क्सवाद, लेनिनवाद व माओ विचारधारायात कयाः सः तया वनेगु जुइ धयादिल। वय्कलं एकीकृत माओवादीलिसे थःपिंसं समानताया आधारय् एकता यायेत्यनागु खः धयादिसें माओवादी दुने विलय जुइत्यनागु मखु धकाः नं स्पष्ट यानादिल ।
