'संविधानसभाया मेगु चुनाव सम्भव मदु'
यल (सन्ध्या टाइम्स)/'शान्ति प्रक्रियाय् न्हूगु संविधान व मानव अधिकार' विषयय् थन छगू बिचाः गोष्ठी जुल।
ललितपुर नागरिक अभियान व कवि क्याफेया मंकाः ग्वसालय् जूगु उगु ज्याझ्वलय् न्ववासें नागरिक आन्दोलनया न्ह्यलुवा डा. सुन्दरमणि दीक्षितं यदि इलय् संविधान मवल धाःसा राष्ट्रपति शासन लागू जुइगु वा संविधानसभा भंग जुइगु खँ वयाच्वंगु बारे कुलादिल। वय्कलं धयादिल, 'यदि राष्ट्रपति शासन लागू जुल धाःसा व कटवालया हे शासन जुइ, मेगु चुनाव यायेगु धइगु ला झन् सम्भव हे मदुगु खँ खः। थ्व अवस्थाय् युद्ध व विदेशी चलखेल अप्वइ।' अमेरिकाय् नं संविधान दयेकूगु इलय् सहमति हे कायम मजुइवं बेन्जामिन फ्रेंकलिनं चित्त बुझे मजूगु खँयात लिपा मिले यायेगु कथं आः गथे दु अथे हे संविधान लागू यायेमाः धकाः सुझाव बिउ कथं न्हूगु संविधान लागू याःगु खः धयादिल ।
मेम्ह न्ह्यलुवा कृष्ण पहाडीं थौंकन्हय् तःधंगु स्वंगुलिं पार्टी इलय् संविधान पिकायेगु सिबें नं थःपिनि आयु ताःहाकः यायेत संक्रमणकालीन अवस्थायात हे ताःहाकः यायेगु लँय् वनाच्वन धयादिल। ग्वसाः खलःपाखें शाक्य सुरेनं आः तक सहमति जुइधुंकूगु खँत दुथ्याकाः संविधान जारी हे यायेगु व सहमति मजूगु खँ लिपा मिले याःसा जीगु बिचाः प्वंकादिल ।
