व मिसाम्ह त्याक्सी चालक

नीरमति बज्राचार्य

थौं नारी दिवसया झ्वलय्

छन्हु न्हूसतकय् जि व म्ह्याय् पसः वनागु। अनायास वा झ्वाम्-झ्वाम् वल। स्वयम्भू थ्यंक लिहां वनेमानिगु। मनूत इपांथिपां मदयेक ब्वाँय् जुल। लँ धुछि लखं लिपुलिपु जायेधुंकल। थःपिं नं म्ह छम्हं छुट्टि जुइधुंकल। आः छु यायेगु, त्याक्सीं सां छेँय् लिहां वनेमाली धकाः हथाय् चाया। वा वःगुलिं त्याक्सी नं खाली मदु। बल्ल छगः त्याक्सी दिका तर स्वयम्भुइ वनेगु धयां निसः तका बिउसा जक वनेगु धाल। सछि हे म्वाःथाय् निसः मछि धाःगुलिं म्वाःल धकाः लित छ्वया। मेगु छगः त्याक्सी वल। स्वयम्भू धायेसातकि लिसः हे मबिसे हुतुतुतु ब्वाके यंकल। स्वयम्भू धालकि छाय् त्याक्सीत वने मधाइगु धकाः निम्ह मां म्ह्याय् भुनुभुनु हालाच्वना। का म्वाःल, थन च्वनाः त्याक्सी दइ मखु, एन.ए.सी. वनेगु धकाः निम्हं अन वया। थनसा टेम्पोय्सां माइक्रो बसय्सां च्वने धकाः मति तयाः वयागु खः। तर तसकं हुल जूगुलिं छुकीसं च्वनेगु आँट हे याये मफुत। भचा पिया। बल्ल छगः त्याक्सी लुल। काचाकाचां दुहां नि वना। स्वयम्भू वनेगु धया, जिउ धाधां त्याक्सी न्ह्याकल ।

त्याक्सी च्वनापिनि त्याक्सी चले याइम्हेसिगु सः ला मिसायागु थें च्वं धकाः निम्हं छक्वः ला अजूचाया। खः ला मखु ला धकाः हाकनं छक्वः न्यना - गुगु लं वनेगु ड्राइभर साहेब? वं लिफः स्वस्वं धाल, 'झी डल्लुं वने मजिउला?' वयागु ख्वाः खनेवं जिपिं मां म्ह्याय् निम्हं छक्क जुल। व धात्थें मिसा खः ला, मिजं खःला वा तेस्रो लिंगी जकं खः ला धकाः नुगलय् खँ वायेका। मिसातय्सं त्याक्सी चले याःगु ला मखनानिगु। लिउने स्वया। ताःहाकयेक सँ नं मदु। बछि हाकः जक सँ दु। बल्ल वयागु सलं व पक्का हे मिसाम्ह खः धकाः क्वःछिना ।

जिं धया, 'जिउ जिउ डल्लुं हे वनेगु बांलाइ'। मिसाम्ह त्याक्सी चालक जुयाः बुलुहुँ न्ह्याका यंकल। मिसाम्ह चालक जुयाः वयागु खँय् न्यनेकने याये मास्ति वल ।

'अहो, छिं त्याक्सी चलेयानागु गुलि दत? आःतक जिमिसं ला मिसाम्हेस्यां चले याःगु त्याक्सीइ गबलें च्वने मनं नि। थौं भाग्यं छिगु हे त्याक्सीइ च्वनेदत। गुलि त्याक्सी दिकेत स्वयां सुनानं वने मधाः। धन्य छि मिसाम्ह लात।'
वं धया हल, 'छु याये, थ्व त्याक्सी चले यानागु निदँ ति दत। सायद मिसाम्ह त्याक्सी चले याःम्ह न्हापांम्ह जि हे जुल ला? ग्यारेज ला कालिमाटी। अप्वः धयाथें जि थन न्हूसतकय् पिया च्वनेगु ।'

जिं तीजक न्यना, 'छिं छाय् ले थथे त्याक्सी चले यायेमाःगु?'

'छु याये चले मयासें। न्ह्यःने लाःगु ज्या स्वयां थ्व ज्या बां हे लाः। मिसातय्सं त्याम्पो चले यायेफुसा त्याक्सी नं चले यायेफइ। वहे मतिइ तयाः त्याक्सी चले याना।' वं त्याक्सी चले यायां लिसः बिल ।

'छिगु छेँ गन ले?' जिगु जिज्ञासायात म्हो यायेगु कुतः यायेगु तातुनाः न्यना। व त्याक्सी चालकं थःगु नुगः खँ प्वंकल, 'जिगु छेँ किपुली। जिगु नां तारादेवी तुलाधर। जि किपूया बज्राचार्य खः, तर ब्याहा चाहिं तःबहाःया तुलाधर जातया मिजंनाप जूगुलिं आः तुलाधर जुल। तर जि जहान मदयेधुंकल। जि म्ह्याय् छम्ह दु ।'

लँ धुछि उम्ह मिसाम्ह त्याक्सी चालकनाप खँ ल्हाल्हां वया। जिपिं स्वयम्भुइ भुइख्यःपाखे थ्यंबलय् जिं धया, 'जिपिं नं बज्राचार्य खः। छेँ ला झ्वाःबहालय् खः तर थौंकन्हय् स्वयम्भुइ च्वंच्वनागु खः।' नेवाः जूगुलिं हे जुइ, जिमि दथुइ याउँक हे खँ ब्याके दत। मिसा जात जुयाः नं त्याक्सी चले यायफुम्ह नेवाः मिसा खनाः जितः तसकं लसता वल। वयात धया, 'छि छम्ह हिम्मत दुम्ह मिसा खः, मिसातय्सं जक याये मजिउगु व मफुगु छु दु?' थथे धया ववं स्वयम्भुइ छेँ न्ह्यःनेसं थ्यन। गुइतका जक माः धाःथाय् जिं वयागु साहस खनाः झितका ध्यबा नं लित मकासे सछि हे बिया। लिपा नापलायेगु धासें बुलुहुँ छेँय् वया। छेँय् थ्यनेवं मां व म्ह्याय् निम्हेस्यां व मिसाया साहस व दुःखया खँ ब्याकाच्वना। मिसात जक छु कम? ज्या यानाः नयेत छुकिया लज्या? नेवाः झन लिउने लानाच्वंगु अवस्थाय् व मिसां त्याक्सी चले यानाः क्यनाः म्ह्याय् नं काय थें ला खःनि धकाः क्यना बिल। छाय् जक मिजंतय्सं मिसातय्त हेला याइगु? अवसर जक बिल धाःसा मिसात नं मिजं स्वयां छुं कम मजू। मिसातय्सं नं न्ह्यागुं ज्या यायेफु। धन्य, व मिसाम्ह त्याक्सी चालक ।

More Stories Like this