उर्जा संकट ज्यंकेत सरकार गम्भिर जुइत इनाप
उर्जा व्यवस्थापनय् प्राधिकरण कमजोर
येँ (सन्ध्या टाइम्स)/नेपाल विद्युत प्राधिकरणं सही धंगं उर्जा व्यवस्थापन व वितरण याये मफुगु खँ निजी ख्यः उद्यमी व व्यवसायीतय्सं धाःगु दु। लिसें प्राधिकरणं सही धंगं विद्युत व्यवस्थापन याये मफुगु खँय् नं आपत्ति प्वंकूगु दुसा थुकिया निंतिं सरकारं उर्जाया मेगु विकल्प माले माःगु बिचाः नं न्ह्यःने हःगु दु ।
नेपाल इलेक्ट्रिकल इन्जिनियरिङ्गया थन जूगु झिंगुक्वःगु वार्षिक साधारण सभाय् न्ववायेगु झ्वलय् सम्बन्धि वित्रतय्सं थुकथंया बिचाः तःगु खः। ज्याझ्वलय् सहभागि उद्यमी व व्यवसायीया लिसें जलस्रोत विज्ञतय्सं प्राधिकरणं उर्जाया सही व्यवस्थापन याये मफुगु कारणं हे थौं देशय् उर्जा संकट ब्वलंगु दावी याःगु दु ।
ज्याझ्वलय् न्ववासें नेपाल उद्याग वाणिज्य महासंघया नायः कुशकुमार जोशीं सरकार उर्जा संकटया समस्या ज्यंकेगु पाखें गम्भिर मजूगु धासें स्वदेशी उत्पादन व उद्योगयात प्रवर्द्धन यायेगु निंतिं छुं हे पहल मयाःगु नं द्वपं बियादीगु दु।
उगु हे ज्याझ्वलय् महासंघया उपाध्यक्ष भाष्कर राजकर्णिकारं देय् आर्थिक सुचकांक झन्झन् खतराय् राना वनाच्वंगु व व्यवसायीतय् न्हापांगु प्राथमिकता शान्ति सुरक्षा जूगु धारणा तयादिल। अथे हे महासंघया मेम्ह उपाध्यक्ष प्रदिपजंग पाण्डें प्राधिकरण दुने जुयाच्वंगु भ्रष्टाचार व अनियमिततायात पने मफुगु खँ न्ह्यथनादिल ।
नेपाल चेम्बर अफ कमर्सया नायः सुरेन्द्रवीर मालाकारं देय्या अर्थ तन्त्र विकासया निंतिं सरकार गम्भिर मजूगु द्वपं बिसे वय्कलं राजनीतिक नेतृत्वं अर्थतन्त्रया विकासया गुबलें नं प्राथमिकता मबिउगु नं द्वपं बियादीगु दु ।
ज्यझ्वलय् जलस्रोत विज्ञ ज्ञानेन्द्र प्रधानं नं उर्जा संकट समस्या ज्यंकेगु निंतिं व उकिया विकल्प मालृगु निंतिं सरकार गम्भिर मजूगु द्वपं बियादीगु खःसा सकलें वक्तातय्सं उर्जा संकट म्हो यायेत व बांलाक व्यवस्थापन यायेगु निंतिं सरकार गम्भिर जुइमाःगु बिचाः प्वंकूगु खः ।
