गभर्नरया खँय् एमालेय् हे विवाद
येँ (सन्ध्या टाइम्स)/नेपाल राष्ट्र बैंकया गभर्नर नियुक्तिया खँय् स्वयम् एमाले दुने हे विवाद पिहां वयाच्वंसां उखे कांग्रेसं धाःसा प्रम माधव नेपालया सरकार ग्वःन्हु च्वनी धइगु निश्चित मदुगु कारणं न्हूम्ह गभर्नर नियुक्ति हे याके मबीगु कथंया ज्या याना हयाच्वंगु खँ सी दुगु दु।
गभर्नरया लागिं स्वम्हेसिया नां सिफारिस जुयाच्वंगु दुसा कांग्रेसं डेपुटी गभर्नर विरविक्रम रायमाझीया नांयात समर्थन यानाच्वंगु दु। रायमाझी न्हापा दरवारिया धकाः म्हसिउम्ह खः ।
उखे एमाले दुने धाःसा प्रधानमन्त्री माधव नेपालं योजना आयोगया युवराज खतिवडाया नां न्ह्यःने हयाच्वंगु दुसा अर्थमन्त्री सुरेन्द्र पाण्डें खतिवडाया नांयात अस्वीकार यासें सचिव रामेश्वर खनालया नांयात समर्थन यानाच्वंगु दु। थुकिं यानाः एमाले दुने नं गभर्नरया खँय् विवाद पिहां वयाच्वंगु दु। एमालेया थ्व विवादयात न्ह्यःने तयाः कांग्रेसं धाःसा गभर्नरया भाग थःपिंत हे माः धकाः दावी याना हयाच्वंगु दु। थ्व कचवनं यानाः ई पुलेधुंकूसां नं गभर्नर ल्ययेगु ज्या जुइ मफयाच्वंगु खँ सूत्रं धाःगु दु ।
