थौं मार्च ८ तारीख, अथेधयागु अन्तराष्ट्रिय श्रमीक महिला दिवस

थौं मार्च ८ तारीख, अथेधयागु अन्तराष्ट्रिय श्रमीक महिला दिवस हिलंया श्रमीक मिस्तय्गु हकहितया पक्षय् जुयाच्वंगु ज्याया समिक्षा यानाः हिलंन्यंकं हनावयाच्वंगु अन्तराष्ट्रिय श्रमिक महिला दिवस हनेगु भुवः थुगु दँय् सच्छि दँ पूवंगु दु ।

थ्वहे झ्वलय् नेपाः नापं हिलंयंकं थीथी ज्याझ्वः याना थुगु दिवस हनाच्वंगु दु । सन् १९१० य् थीथी झिंन्हय्गु देय्या सच्छि समाजवादी मिस्तय्सं निक्वःगु अन्तराष्ट्रिय सम्मेलनं दच्छि छक्वः हिलंन्यंकंया मिस्तय्सं मार्च ८ यात मिसा अधिकार आन्दोलन दिवसया रुपय् हनेगु यानाहःगु खः । सन् १८५७ य् अमेरिकाया गार्मन्टय् ज्या याईपं श्रमिक मिस्तय्गु ज्याया लिधंसाय् निश्चित ज्यालाया माग नापं याःगु ब्वज्यायात हलिमय् मिस्तय्गु आन्दोलनया सुरुवातया रुपय् कायेगु याःगु दु । नेपालय् बि.स. १९७५ निसें मिसा हकहित व अधिकारया ज्याझ्वः यानाः थुगु दिवस हनेगु याःगु खः ।

नेपालय् थुगु दँय् 'फुक्कसिया विकासया निंतिं समान अवसर व समान अधिकार' धैगु मू नारा ज्वनाः थीथी चेतनामूलक ज्याझ्वः यानाः थुगु दिवस हनाच्वंगु दु । नेपालय् संविधानसभाय् स्वीस्वंगू प्रतिशत अथे धयागु सच्छि व गुइन्हय्म्ह मिसा सभासद्या ब्वति दु । सरकारं मिस्तय्गु हक अधिकार सुनिश्चित यायेत थीथी कानुन निर्माण याना लागू तकं याःगु दु । थुगु दँय् जक घरेलू हिंसा विरुद्धया ऐन हःगु दु ।

थ्वहे दथुइ प्रधानमन्त्री माधवकुमार नेपालं सच्छियौं अन्तराष्ट्रिय श्रमीक महिला दिवसया लसताय् भिंतुना बियादिल । प्रधानमन्त्री नेपालं मिसा हिंसाविरुद्ध अभियान न्ह्याकेत सरकारं सन् २०१० यात मिसा हिंसाविरुद्धया दँ कथं हनेगु निर्णय यानाः कार्ययोजना कार्यान्वयन सुरु यायेधुंकूगु धासें थुगु अभियानयात सकसिनं ग्वाहालि यायेत इनाप यानादिल ।