वर्तमान सरकारया औचित्य समाप्त : यादव
मधेसी जनअधिकार फोरमया अध्यक्ष उपेन्द्र यादवं वर्तमान सरकारया औचित्य समाप्त जुइधुंकूगुलिं तत्काल राजीनामा बीमाःगु खँ धयादीगु दु ।
मधेसी पत्रकार समाज जनकपुरं आइतवाः सुथय् ग्वसाःग्वःगु साक्षात्कार ज्याझ्वलय् न्ववानादिसें यादवं सरकार शान्ति सुरक्षा बीत असफल जूगु द्वपं बियादिसें देशय् जंगलराज्य चलेजुयाच्वंगुध धयादिल । देशय् अप्वयाच्वंगु हत्या, हिंसा व अशान्तिया ल्यूने सरकारया कमजोरी दुगु धयादिसें अपराधीतय्त राज्यं हे संरक्षण यानाच्वंगु द्वपं बियादिल ।
वय्कलं मधेसया हक अधिकारया सः ल्ह्वनीपिं मधेसी पत्रकार व संचार उद्यमीयात योजनावद्ध तरीकां हत्या यायेगु ज्या जुयाच्वंगु प्रति आक्रोश प्वंकादिल । सरकार अझ नं मधेशयात उपनिवेशिक शासन दयेकीगु योजनाय् दुगु व थ्व योजनाया विरोध याइपिं कलमजिवीत निसानाय् लाःगु धयादिल ।
शान्ति स्थापना, माओवादी लडाकु समायोजन व इलय् हे संविधान निर्माण यायेत तत्काल सहमतिया राष्ट्रिय सरकार गठन जुइमाःगु खँय् बः बियादिसें फोरम अध्यक्ष यादवं इलय् हे संविधान निर्माण व मधेसया मुद्दायात सम्बोधनया निंतिं फोरमं थ्वहे वा निसें आन्दोलन यायेगु धयादिल ।
