संविधान विघटन यासाः हानं जनयुद्ध : भट्टराई
एकीकृत नेकपा (माओवादी)या उपाध्यक्ष डा. बाबुराम भट्टराईं संविधानसभा विघटन यासाः निक्वःगु जनयुद्ध यायेगु ख्याच्वः बियादीगु दु । वय्कलं संविधान निर्माण यायेत मंकाः सहमति मजुसाः देय् तःधंगु द्वन्द्वय् फसेजुइगु धयादिल ।
माओवादीं शनिवाः बर्दियाय् या:गु राष्ट्रियता, नागरिक सर्वोच्चता व संविधान निर्माणया हाथ्या विषयक अन्तक्रिया ज्याझ्वलय् न्ववानादिसें नेता भट्टराईं विदेशी व सैनिक हस्तक्षेप विरुद्ध सजग जुइत माओवादी कार्यकर्तातय्त निर्देशन बियादिल ।
वय्कलं जनता बुकूपिं सत्ताय् वनाः इलय् हे संविधान निर्माण यायेमबीगु षड्यन्त्र यानाच्वंगु द्वपं बियादिसें प्रतिगमनकारीतय्सं सत्ता कब्जा यानाः सैनिक शासन लागू यायेगु तयारी यानाच्वंगुलिं उकीया प्रतिवाद यायेत कार्यकर्तातय्त इनाप यानादिल । निर्वाचनय् बूपिं सत्ताय् दुगुलिं देशय् हत्या, हिंसा व दण्डहीनता अप्वःगु धयादिसें वय्कलं जनादेश विपरित सत्ताय् थ्यनीगु धइगु लोकतन्त्रया उपहास जूगु धयादिल ।
