संवैधानिक नियुक्त बारे कांग्रेस-एमाले दथुइ सहलह
सत्तारुढ दलत नेपाली कांग्रेस व नेकपा (एमाले) दथुइ खाली जुयाच्वंगु संवैधानिक नियुक्ति बारे सहलह जूगु दु । थुकीया बारे सहलह यायेत प्रधानमन्त्री माधवकुमार नेपाल, एमाले अध्यक्ष झलनाथ खनाल लगायत नेतात शनिवाः सुथय् कांग्रेस सभापति गिरिजाप्रसाद कोइराला निवास थ्यंकूगु खः ।
निगू दलया शीर्ष नेतात दथुइ राष्ट्र बैंकया गभर्नर नियुक्ति लगायत खाली जूगु संवैधानिक निकायलय् नियुक्ति यायेगु बारे सहलह जूगु ख: । निगू दलया नेतात दथुइ सहलह जुसां छुं सहमति मजूगु खँ एमाले अध्यक्ष खनालं कनादिल । वय्कलं थुकीया बारे सहलह यायेत आइतवाः हानं बैठक च्वनीगु जानकारी बियादिल ।
थ्वस्वयां न्ह्यः शुक्रवाः च्वंगु निगू दलया बैठकय् एमालें गभर्नर पदय् योजना आयोगया पुलांम्ह उपाध्यक्ष युवराज खतिवडायात नियुक्त यायेमाःगु अडान काःगु खःसा कांग्रेसं धाःसाः राष्ट्र बैंकया डेपुटी गभर्नर वीरविक्रम रायमाझीयात गर्भनर नियुक्त यायेमाःगु अडान काःगु खः ।
