'माओवादीं हिंसा त्वःतुसाः राष्ट्रिय सरकार'
नेकपा (एमाले)या अध्यक्ष झलनाथ खनालं माओवादीं हिंसात्मक चरित्र त्वःतेगु प्रतिबद्धता प्वंकूसाः राष्ट्रिय सहमतिया सरकार गठन यायेफइगु खँ धयादीगु दु ।
साहित्यकार झमककुमारी घिमिरेया सम्मानार्थ शनिवाः येँ याःगु छगू ज्याझ्वलय् न्ववानादिसें अध्यक्ष खनालं माओवादीं न्हापा जूगु सम्झौताया पालाना मयागु, कब्जा यानातःगु छेँबुँ लितः मब्यूगु, लडाकु समायोजनय् ग्वाहालि मयागु धयादिसें यदि माओवादीं थ्व दक्वं खँ इमान्दारीया साथ पालना याइसाः राष्ट्रिय सरकार गठन यायेत एमाले तयार दुगु धयादिल ।
वय्कलं एमालेया जारी केन्द्रीय कमिटीया बैठकय् थःम्ह थ्वहे कथं प्रस्ताव न्ह्यब्वयाःगु धयादिसें माओवादीयात इमान्दार जुइत इनाप यानादिल । वय्कलं राजनीतिक गतिरोध जुयाच्वंसां संविधान च्वयेगु ज्या न्ह्यानाच्वंगु धयादिसें अविश्वासयात छखे तयाः दलत सहमतिलय् वयेमाःगु धयादिल ।
