माओवादी सैनिक संगठन जक खः : रक्षामन्त्री
रक्षामन्त्री विद्यादेवी भण्डारीं एनेकपा (माओवादी) पार्टी मखसें सैनिक संगठन जक जूगु खँ धयादीगु दु । नापं वय्कलं माओवादी सैनिक संगठन जक जूगुलिं माओवादी नेतृत्वया सरकार गठन जुइमफइगु धयादिल ।
नेकपा (एमालें) बुधवाः दाङय् याःगु आमसभायात सम्बोधन यानादिसें मन्त्री भण्डारीं माओवादीं शान्ति सम्झौतया उल्लंघन यानाच्वंगु द्वपं बियादिसें माओवादी राजनीतिक पार्टी जुइत उगु पार्टी नाप दुगु ल्वाभः नष्ट यायेमाःगु व लडाकुतय्त निशस्त्र यानाः व्यवस्थापन यायेमाः धयादिल ।
माओवादीया शिविरय् निगू निसें प्यंगू प्रतिशत लडाकुत जक योग्य जूगु दाबी यानादिसें वय्कलं शिविरय् दुपिं थप अयोग्य लडाकुतय् लिकायेत सरकारं माओवादी नाप लडाकुतय् तथ्यांक फ्वंगु इलय् माओवादीं उपलब्ध मयाःगु द्वपं बियादिल । वय्कलं माओवादीं शान्ति प्रकृयाय् ग्वाहालि याये चाहे मजूगु धयादिसें माओवादीं थःगु लडाकुया मुद्दायात कयाः सत्ता प्राप्त यायेत स्वयाच्वंगु धयादिल ।
अथेहे वय्कलं माओवादीया ल्यूने वनाः नेपाः स्थित राष्ट्रसंघीय मिसन अनमिनं नं सरकारयात ग्वाहालि मयाःगु द्वपं बियादिल ।
