माओवादी लडाकुतय्सं आत्मसमपर्ण याइमखु : प्रचण्ड
एकीकृत (नेकपा) माओवादीया अध्यक्ष पुष्पकमल दाहाल 'प्रचण्डं' माओवादी लडाकुयात आत्मसमपर्ण मयाकीगु खँ धयादीगु दु ।
सर्वहारा कोष स्थापनाया निंतिं येँ शुक्रावाः ग्वसाःग्वःगु छगू ज्याझ्वलय् न्ववानादिसें वय्कलं माओवादी लडाकुतय्त नेपाली सेनाय् सम्मानजनक तरीकां समायोजन यायेमाःगु धयादिल । वय्कलं संविधान निर्माणया नांमय् माओवादी लडाकुयात आत्मसमपर्ण याकेगु कथं खँ वयाच्वंसां अथे जुइमबीगु दाबी यानादिल ।
सत्तारुढ दलत माओवादी लडाकुया व्यवस्थापन लिपाः जक संविधान जारी यायेफइगु खँ धयाच्वंगु खँ न्ह्यथंनादिसें अध्यक्ष प्रचण्डं संविधान च्वयेगु ज्या व सेना समायोजन नापंनापं यायेमाःगु धयादिल ।
वय्कलं जेठ १४ गते न्ह्यः हे संविधान जारी यायेत दलत दथुइ सहलह जुयाच्वंसां सहमति मजुनीगु धयादिसें संविधान जारी यायेगु खँय् षड्यन्त्र जुसाः उकीया विरुद्ध संघर्ष यायेगुया विकल्प मदुगु धयादिल । नापं वय्कलं राष्ट्रिय सहमतिया सरकारं जक जनताया चाहना कथं न्हूगु संविधान घोषणा यायेफइगु व सेना समायोजन यायेफइगु दाबी यानादिल ।
