वर्कर्स कार्यकर्तां बसय् मि तल
येँ (सन्ध्या टाइम्स)/भूमिगत किराँत जनवादी वर्कर्सया ल्वाभः ज्वनावःपिं कार्यकर्तातय्सं थौं सुथय् उदयपुरया रामपुरठोक्सीला धइगु थासय् छगः यात्रुवाहक बसय् मि तया बिउगु दु। प्रहरीं ज्वनातःपिं थःपिनि कार्यकर्ता तुरुन्त त्वःतेमाःगु माग यासें इमिसं अन बन्द आह्वान यानातःगु खःसा बन्दया अवज्ञा याःगु धकाः वर्कर्स कार्यकर्तातय्सं बसय् मि तया बिउगु खः। इमिसं बा. २ ख ३८३ नम्बर बसय् मि तःगु खः ।
उदयपुरया रामपुर बजारं सदरमुकाम गाईघाटपाखे वनाच्वंगु उगु बसयात थौं सुथय् ८ बजे नियन्त्रणय् कयाःलि मि तःगु खः ।
जिल्ला प्रहरी उदयपुरया प्रहरी नायव उपरीक्षक मनोज यादवं कम्ब्याट पोशाक पुनाः ल्वाभः ज्वनावःपिं स्वम्ह कार्यकर्तां बसय् मि तयावंगु खँ धाःगु दु। इमिसं बसया चालक नापं फुक्क यात्रुतय्त क्वकयाः बसयात तोडफोड यायेधुंकाः मि तयावंगु खः ।
वंगु छवाः न्ह्यः रामपुर ठोक्सिला गाविसया स्थानीय सामुदायिक वन उपभोक्ता समुहयाके चन्दा फ्वंगु इलय् वर्कर्सया एरिया इन्चार्ज धरती धइम्ह जीवन राईयात प्रहरीं ज्वंगु खः ।
राईयात वर्कर्स कार्यकर्तां वयात त्वःतेत माग यासें मत्वःतूतले बन्द यायेगु धकाः लँ पना तःगु खः ।
