सुकुम्बासी अधिकारया घोषणापत्र जारी
येँ (सन्ध्या टाइम्स)/न्हूगु संविधानय् सुकुम्बासीतय् अधिकार नं सुनिश्चित यायेमाः धइगु माग यासें सुकुम्बासीतय् थीथी संगठनं सुकुम्बासी घोषणापत्र जारी याःगु दु ।
नेपाल बसोवास वस्ती संरक्षण समाज, नेपाल महिला एकता समाज व बाल विकास युवा संजालं ताःई न्ह्यवंनिसें थुकिया निंतिं माग याना वयाच्वंगु खः। संयुक्त राष्ट्र संघया मानव अधिकार घोषणापत्र १९४८ या धारा ११ (१) यात नेपाः सरकारं अनुमोदन यायेधुंकूगु कारणं सकस्यां सुरक्षित बसोबास याये दइगु अधिकारयात नेपाः सरकारं सम्मान याये माःगु उमिगु दावी दु ।
नेपालय् थौंकन्हय् अथे हे ४० लाख ति सुकुम्वासी दु धइगु दावी यासें यदि थ्व समस्या इलय् हे समाधान मयात धाःसा थ्व लिपा वनाः राष्ट्रिय समस्याया रुपय् विकास जू वनीगु ख्याच्वः नं थ्व सुकुम्वासी पुचःतय्सं बिउगु दु। संयुक्त राष्ट्र संघया थ्व घोषणा पत्र कथं नं नेपालय् सकलें सुकुम्बासीतय्त बसोबास यानाः च्वनेगु अधिकार दयेमाः धकाः उमिसं माग याःगु दु ।
