डा. बाबुराम जापान वनीगु, नेपाःयात ग्वाहालि अप्वयेकेत इनाप

नेकपा -माओवादी)या वरिष्ठ नेता व अर्थमन्त्री डा. बाबुराम भट्टर्राई जापान भ्रमणय् वनीगु जूगु दु । वय्कः थ्वहे वइगु फेब्रुवरीया लिपांगु वालय् उखेपाखे झाइगु ग्वसाः दु ।प्रधानमन्त्री पुष्पकमल दाहाल प्रचण्डं यानादीत्यंगु युरोपया नर्वे व फिनल्याण्डया भ्रमण स्थगित जूसां सरकारया मेम्ह वरिष्ठ मन्त्री डा. भट्टर्राईया जापान भ्रमण धाःसा जुइत्यंगु खः । प्रधानमन्त्री प्रचण्डया युरोप भ्रमण नं मेमेगु उद्देश्य स्वयां नं आर्थिक उद्देश्यं हे जुइत्यंगु खः ।

जापान सरकारया ब्वनाय् वय्कलं थ्व भ्रमण यानादीत्यंगु खँ विशेष सूत्रं धाःगु दु । भ्रमणया झवलय् वय्कलं नेपाःया वर्तमान राजनीतिक अवस्थायात कयाः जापानी सरकारनाप खँल्हाबल्हा यानादीगु ग्वसाः दु । भ्रमणया झवलय् वय्कलं विशेष यानाः जापानं नेपाःयात याये फइगु आर्थिक ग्वाहालियात कयाः खँल्हाबल्हा यानादी । छगू इलय् नेपाःया दकलय् तःधंगु दाता राष्ट्र जापान जुयाच्वंगु खः । थौंकन्हय् नेपालय् जापान स्वयां अमेरिकाया ग्वाहालि अप्वयाच्वंगु दु । अर्थमन्त्री भट्टर्राईनं जापान वनाः थःगु देशयात न्हापा थें तुं जापानी ग्वाहालि अप्वयेकेगु लागिं कुतः यानादीगु खँ धाःगु दु । सूत्रं बिउगु जानकारी कथं वय्कलं नेपाःयात थौंकन्हय् वयाच्वंगु विद्युत समस्या व उकी जापान सरकारं याये फइगु ग्वाहालिया निंतिं इनाप यानादी ।

वय्कःया थ्व भ्रमणय् नेपाःया जलविद्युत सम्बन्धी विज्ञत नापं व्यापारीत नं दुथ्याये फइगु खँ धाःगु दु । सूत्रया कथं जापानय् सरकारं हे नीस्वनातःगु छगू हाइड्रो पावर कम्पनी नं नेपाःया जलस्रोत क्षेत्रय् लगानी यायेत उत्सुक जुयाच्वंगुलिं भ्रमणया झवलय् जलविद्युत सम्बन्धी लगानीया बारे नं सम्झौता जुइ फइगु सम्भावना दु । अर्थमन्त्री डा. भट्टर्राईनं नं थुगुसी दयेकूगु बजेटय् न्हापा न्हापा थें तुं वैदेशिक ग्वाहालिया तःधंगु आशा यानातःगु दु । न्हापा न्हापाया सरकारतय्सं दयेकीगु बजेटया अप्वः ब्व जापानी ग्वाहालिं प्राप्त जुइगु खःसा देशय् गणतन्त्र पलिस्था जुइधुंकाः जापानपाखें वइगु ग्वाहालि म्हो जुयाच्वंगु दु । नेपालय् वःगु हिउपाःयात जापानं र्सतर्कतापर्ूवक अध्ययन यानाः जक प्रतिक्रिया बिउगु खः । लुमंकेबह जू, नेपालं राजतन्त्र चीके मजिउ धकाः जापानं उगु इलय् लिउने च्वनाः सशक्त लबिङ्ग याःगु खः ।