'याकनं राजनीतिक सहमति याः'
इलय् हे संविधान जारी यायेत याकनं राजनीतिक सहमति यायेत संविधानसभाया अध्यक्ष सुवास नेम्वाङं इनाप यानादीगु दु ।
निजी व आवासीय विद्यालय अर्गनाइजेशन (प्याब्सन)या झिक्वःगु महाधिवेशनया भैरहवाय् शुक्रवाः उल्लेज्या यानादिसें वय्कलं इलय् हे संविधान निर्माण यायेत दलतय्सं भाषण बीगु मखसें दलतय्सं राजनीतिक सहमति यायेमाः धयादिल । वय्कलं दलतय्सं याकनं सहमति यासा: जनताया विश्वास त्याकेफइगु धयादिल ।
शान्ति व अग्रअमनया निंतिं न्हूगु संविधान माःगु बारे दक्वं दलतय् समान बिचाः जूगुलिं संविधान निर्माण यायेत दक्वं दलत गम्भीर जुयाः लगेजुइगु विश्वास अध्यक्ष नेम्वाङं प्वंकादिल । वय्कलं संविधानसभाया झिंछगू समिति मध्ये निगू समितिइ जक सर्वसम्मतिया आधारय् प्रतिवेदन तयार जूगु धयादिसें मेगू गुंगू समितिया प्रतिवेदनय् नं सहलह यानाः सर्वसम्मत यायेत इनाप यानादिल ।
शुक्रवाः शुरु जूगु प्याबसनया महाधिवेशनय् देय्न्यंकया खुइप्यंगू जिल्लाया द्वछि स्वयां अप्वः प्रतिनिधि व निसः पर्यवेक्षकया ब्वति दुसाः महाधिवेसनं प्याब्सनया न्हूगु नेतृत्व चयना यासें भैरहवा घोषणापत्र जारी याना: आइतवाः क्वचाइगु ज्याझ्वः दु ।
