माओवादी नेतृत्वया सरकार असम्भव : ओली
नेकपा (एमाले)या वरिष्ठ नेता केपी शर्मा ओलीं वर्तमान इलय् माओवादी नेतृत्वया सरकार गठन जुइ असम्भव जूगु खँ धयादीगु दु । वय्कलं माओवादी शान्तिया लँपूइ मवेकं उमि नेतृत्वय् सरकार गठन असम्भव जूगु धयादिल ।
पोखरा विमानस्थलय् शुक्रवाः संचारकर्मीत नाप खँल्हाबंला यानादिसें नेता ओलीं माओवादीं विद्रोह व बल छ्यलाः ज्या यायेगु मत्वतेकं माओवादीं सरकार गठन यायेमफइगु धयादिल । माओवादी नाप अझ नं सशस्त्र पुचः दुगु व दकलय् न्हापा उमित निशस्त्र यायेमाःगु धयादिल । हिंसा त्वताः संवैधानिक लँपूइ मवेकं माओवादी नागरिक पार्टी जुइमफइगु दाबी ओलीं यानादिल ।
नेता ओलीं संविधान च्वयेगु ज्या क्वचायेत्यंगुलिं आः सरकार परिवर्तन यायेमाःगु आवश्यकता मदुगु धयादिल । म्हो इलय् हे संविधान निर्माण यायेमाःगुलिं आःया प्राथमिकता संविधान निर्माण पाखे जुइमाःगु धयादिसें वय्कलं सरकार परिवर्तन यायेगु पाखे वनेमज्यूगु धयादिल ।
मेगू छगू प्रसंगय् वय्कलं शान्ति सुरक्षा कायम मयाःगु धायेवं गृहमन्त्रीयात सरकारं लित सतेम्वाःगु धयादिल । वय्कलं भचाः भचाः अशान्त जुइवं गृहमन्त्रीं पद त्वतेम्वाःगु बिचाः प्वंकादिल ।
