संविधान निर्माण प्रकृया चीहाक यायेमाः : महरा
एकीकृत नेकपा (माओवादी)या विदेश विभाग प्रमुख कृष्णबहादुर महरां इलय् हे संविधान निर्माण यायेत संविधान निर्माण प्रकृया चीहाक यायेमाःगु खँ धयादीगु दु । वय्कलं संविधान निर्माण प्रकृयायात चीहाक याःसा जक इलय् हे संविधान निर्माण यायेफइगु धयादिल ।
गैरआवासीय नेपाली संघ जापान शाखां दाङ उद्योग वाणिज्य संघयात एम्बुलेन्स लःल्हाःगु समारोहलय् न्ववानादिसें महरां दक्वं खँय् सहमति यायेत थाकुसां मुख्य विषयलय् सहमति यानाः संविधान निर्माण यायेफइगु धयादिल । वय्कलं आः दलत स्पष्ट रुपं प्यंगू धारय् खनेदुगुलिं छगू हे मत जुइत थाकूगु धयादिल ।
वय्कलं २०४७ सालया पुलांगु हे संविधान चाहेजूपिं, संविधासभा विघटन यानाः बिस्कं आयोग दयेकाः संविधान निर्माण याये चाहेजूपिं, जनतायात पूर्ण अधिकार बी चाहेमजूपिं व अग्रगामी संविधान निर्माण याये चाहे जूपिं प्यंगू धार विद्यामान जूगु धयादिल ।
