पत्रकारतय्सं प्रधानमन्त्रीया राजनीमा माग
नेपाल पत्रकार महासंघया अध्यक्ष धर्मेन्द्र झां प्रधानमन्त्री माधवकुमार नेपालया राजीनामा माग यानादीगु दु ।
सुनसरीया सदरमुकाम इनरुवालय् शुक्रवाः स्थानीय संचारकर्मीत नापया सहलह ज्याझ्वलय् वय्कलं पत्रकारतय् सुरक्षा यायेमफुम्ह प्रधानमन्त्रीं पद त्वतेमाःगु खँ धयादिल । वय्कलं पत्रकारतय् सुरक्षाय् लाचारी प्रदर्शन याइम्ह प्रधानमन्त्रीयात छगू मिनेट नं पदय् च्वनेगु अधिकार मदुगु धयादिल ।
अथेहे वय्कलं सरकार व आपराधिक पुचः मिले जुयाः संचार उद्यमी व संचारकर्मीतय्त आक्रमण जुयाच्वंगु द्वपं बियादिल । नापं वय्कलं आः नेपाःया पत्रकारत थःगु ज्यान वनीगु खःला धकाः मग्यायेधुंकूगु धयादिल ।
जनकपुरया संचर उद्यमी अरुण सिंहानियायात स्याःगु विरोधय् सुनसरीया जिल्ला प्रशासन ज्याकूथीइ धर्ना च्वनाच्वंपिं पत्रकारतय्त बुधवाः प्रहरीं बल छ्यलाः घाःपाः यायेवं घाःपाः जूपिं पत्रकारतय्त नापलायेत अध्यक्ष झा शुक्रवाः इनरुवाः थ्यंकादीगु खः ।
प्रहरी दमन लिपाः झिंछम्ह पत्रकारत घाःपाः जूगु घटनाया कुंखिनादिसें अध्यक्ष झां प्रमुख जिल्ला अधिकारी रामप्रसाद थपलिया व प्रहरी उपरीक्षक भुपाल भण्डारीयात तत्काल बरखास्त यायेमाःगु माग नं यानादिल ।
