मधेस विरुद्ध थनिनिसें थारू आन्दोलन
येँ (सन्ध्या टाइम्स)/मधेसवादी राजनीतिक दलतय्सं 'फुक्क मधेस छगू प्रदेश' यायेमाःगु माग यासें आन्दोलन यायेगु नापं संविधानसभाय् सः तयेगु यानाच्वंगु इलय् थारू कल्याणकारिणी सभा नापं थीथी च्यागू थारू संस्थापाखें मधेसवादीतय् थ्व नाराया विरुद्ध मंकाः कथं आन्दोलन न्ह्याकीगु जूगु दु ।
थारूतय्सं थौं थरूहट-तराई लागाया फुक्क जिल्ला प्रशासन मार्फत संविधानसभायात फुक्क मधेस छगू प्रदेश याये दइ मखु, तराई बहुप्रदेश जुइमाः धकाः माग यासें खबरदारी पौ छ्वयाः आन्दोलन सुरु याःगु खः ।
आन्दोलनया झ्वलय् स्वनिगलय् वयाच्वंपिं थारूतय्सं कन्हय् न्हू बानेश्वरय् च्वंगु संविधानसभा भवनय् संविधानसभाया बैठक जुयाच्वनीगु इलय् हे घेराउ यायेगु ज्याझ्वः तयातःगु दु। कन्हय् फागुन २१ गतेया दुने संविधानया मस्यौदा तयार यायेगु धकाः संविधानसभां ज्याया धलः दयेकातःगु खःसां कन्हय् उगु कथंया मस्यौदा दयेके धाःसा मफइगु जूगु दु। आन्दोलनकारी थारूतय्सं कन्हय् हे फुक्क जिल्लाय् मंकाः कथं विरोध सभा यायेगु नापं फागुन २९ गते देय्न्यंकं मशाल जुलुस प्रदर्शन यायेगु नापं चैत्र १ गते थरूहट-तराई बन्द यायेगु घोषणा यानातःगु खः ।
तराई लागाय् म्होतिं नं प्यंगू प्रदेश दयेमाःगु माग यानाः थारूतय्सं उगु कथंया आन्दोलन न्ह्याकूगु खः। थारू समुदायपाखें तराईया आदिवासी जनजाति, मुस्लिम नापं थीथी जातिया पहिचान नापंया अधिकार दइ कथंया बहुप्रदेश दयेकेमाःगु माग यानाः उगु आन्दोलन याःगु खः ।
थःपिनिगु न्हापांगु चरणया आन्दोलनं माग पूरा मजुल धाःसा निगूगु चरणया आन्दोलन अझ सशक्त कथं न्ह्याकेगु जुइ धकाः नं थारू आन्दोलनकारीतय्सं ख्याच्वः बिउगु दु ।
