स्वनिगः पिनें नं शेयर कारोबार शुरु
येँ (सन्ध्या टाइम्स)/येँय् जक केन्द्रीत जुयाच्वंगु शेयर कारोबारया निगूगु बजाःयात स्थानगत रुपं स्वनिगः पिने नं विविधिकरण याना यंकेगु नेपाल स्टक एक्सचेन्जया नीति कथं न्हापांखुसी परीक्षणया रुपय् स्वनिगलं पिने नं शेयरया निगूगु बजाःया कारोबार शुरु जूगु दु ।
थुकिया निंतिं स्टक एक्सचेन्जं शेयर दलालया रिमोट वर्क स्टेशन (आरडब्ल्यूएस) मार्फत स्वनिगः पिनें निगूगु बजाःया कारोबार संचालन यायेत परीक्षण रुपय् बिउगु अनुमति कथं पोखराया नेपाल स्टक हाउसं आः नकतिनि पोखारायम लगानीकर्तातय् सुविधायात ध्यानय् तयाः कारोबार संचालन याःगु दु ।
पोखराय् स्वंगू कम्पनीया प्यंगू कारोबारं छगू लख ग्वीनिद्वः स्वसः व ख्वीतका दांया ल्याखं सछि व पीगू कित्ता शेयर कारोबार जूगु स्टक एक्सचेन्जया अभिलेखं क्यंगु दु।
न्हापांगु चरणय् अप्टिकल फाइबर जडान यानातःगु शहरं कारोबार शुरु यायेगु एक्सचेन्जया नीति कथं नेपाल स्टक हाउस पोखरां थुगु कारोबार शुरु याःगु खः ।
स्वनिगः पिनें सुचीकृत कम्पनीया शेयर कारोबार संचालन यायेत पोखराया प्रिमियर सेक्यूरिटीज लिसें विराटनगरया नेपाल इन्भेष्टमेण्ट एण्ड सेक्यूरिटीज व प्रज्ञान सेक्यूरिटीजं स्वीकृति कयातये धुंकूगु दु ।
अथे हे नेपाल धितोपत्र दलाल संघया समन्वयय् थुपिं निगू शहर बाहेकं वीरगञ्ज, नारायणघात, बुटवल, नेपालगञ्जं नं आरडब्ल्यूएस मार्फत कारोबार संचालनया निंतिं स्वीकृति कयाः प्रक्रिया न्ह्याके धुंकूगु दु। नेपालगञ्जया स्वंगू व मेगु शहरया प्यंगू प्यंगू शेयर दलाल कम्पनीं नं याकनं हे कारोबार संचालनया प्रक्रियाय् वने धुंकूगु स्टक एक्सचेन्जं जानकारी बिउगु दु ।
