सरकारया नेतृत्व परिवर्तन जुइमखु : गच्छदार
उपप्रधानमन्त्री विजयकुमार गच्छदारं वर्तमान सरकारया नेतृत्व छुं नं हालतं परिवर्तन मजुइगु दाबी यानदीगु दु । वय्कलं थ्वहे सरकारं संविधान जारी याइगु धयादिसें माओवादीं धायेवं सरकार परिवर्तन मजुइगु धयादिल ।
रिपोर्टस क्लबं बिहीवाः पोखराय् याःगु पत्रकार नापलायेगु ज्याझ्वलय् वय्कलं संविधान जारी याये स्वलाः न्ह्यः सरकार परिवर्तन जुइ धइगु संविधान निर्माण यायेमबीगु नियत जूगु धयादिल । वय्कलं जनताया म्यानडेट कयाः तःधंगु पार्टी जूगुया जिम्मेवारी सरकार परिवर्तन यायेगु खः वा संविधान निर्माण यायेगु धकाः न्ह्यसः तयादिल ।
उपप्रधानमन्त्री गच्छदारं माओवादी लडाकुयात नेपाली सेनाया मापदण्डया आधारय् जक समायोजन यायेगु धयादिल । माओवादीं स्वीप्यसः ल्वाभः लःल्हाःगुलिं वहे आधारय् लडाकुत सेनाय् समायोजन यायेमाःगु धयादिसें वास्तविक लडाकुया पहिचान यानाः जक सेना समायोजन जुइगु धयादिल ।
