एमालें सरकारनाप शान्ति सुरक्षाया माग
राजीनामा बीमखु : गृहमन्त्री
सरकारया नेतृत्व यानाच्वंगु नेकपा (एमालें) छुं ई थुके देय्या थीथी थासय् हत्या, अपहरण थंज्याःगु ज्या अप्वःगु धासें सरकार नाप शान्ति सुरक्षा कायम यायेत माग याःगु दु । बिहीवाः च्वंगु पार्टीया केन्द्रीय कमिटीया बैठकं पास याःगु प्रस्तावय् थंज्याःगु घटजन प्रति पार्टीया गम्भीर ध्यानाकर्षण जूगु खँ न्ह्यथंनातःगु दु ।
अथेहे जनकपुरय् संचार उद्यमी अरुण सिंहानियाया हत्यां पार्टीयात स्तब्ध याःगु खँ धासें उगु हत्याया भर्त्सना याःगु दु । अथेहे घटनया सत्य, तथ्य पत्ता लगे यानाः अपराधीयात कडा कारवाही यायेत नं सरकार नाप माग याःगु दु ।
उखे एमाले नेता नापं जुयादीम्ह गृहमन्त्री भीम रावलं छगू निगू घटनायात कयाः थःम्हं पदं राजनीमा मयायेगु स्पष्ट यानादीगु दु । बिहीवाः येँय् जूगु साक्षात्कार ज्याझ्वलय् वय्कलं थंज्याःगु इलय् राजीनामा बीगु मखु बरु घटनाया सामना यायेगु धयादिल ।
वय्कलं विशेष सुरक्षा योजनायात असफल दयेकाः देशय् अस्थिरता व अरजकता ब्वलंकेगु षड्यन्त्र जुयाच्वंगु धयादिल । वय्कलं अज्याःपिं अपराधीतय्त निस्तेज यायेत सरकार सक्षम जूगु दावी यानादिसें स्वार्थी सुरक्षाकर्मी, राजनीतिकर्मी व कर्मचारीत थंज्याःगु षड्यन्त्रय् सामले जूगु द्वं बियादिल ।
