जग्गा कब्जा याःगु खँय् माओवादी व प्रहरी दथुइ ल्वापू
पूर्वी चितवनया बछौली गाविसय् च्वंगु मालपुरय् दुगु निजि जग्गा कब्जा यायेत स्वयेवं प्रहरी व माओवादी कार्यकर्तात दथुइ ल्वापू जूगु दु ।
बिहीवाः सुथय् माओवादी कार्यकर्तातय्सं शहीद स्मृति वाटिका दयेकीगु धासें जंगीलाला श्रेष्ठ च्वनावयाच्वंगु ६ कट्ठा जग्गाय् माओवादी ध्वाँय् गडे याःगु खःसा लिपाः प्रहरी उकीयात लिकायेवं माओवादी कार्यकर्ता व प्रहरी दथुइ ल्वापू जूगु खः ।
माओवादीं उगु जग्गा गां ब्लकया जूगुलिं शहीद वाटिका दयेकेत्यनाःगु दाबी याःगु दु । माओवादीं कब्जा यायेत स्वःगु जग्गा खाली यायेत प्रहरीं इनाप याःगु खःसां माओवादी कार्यकर्तातय्सं वास्ता मयायेवं प्रहरीं बल छ्यःगु दु । उकीया लिसलय् माओवादी कार्यकतातय्सं नं प्रहरीयात अप्पां कयेकूगु खः । ल्वापूइ लानाः गुम्ह प्रहरी घाःपाः जूगु दुसाः माओवादी पाखे न्याम्ह कार्यकर्ता घाःपाः जूगु दु ।
माओवादीं थः कार्यकर्तातय्त प्रहरीं दमन याःगु धासें आः चितवनया रत्ननगर, टाँडी, बछौली, सौराहा पर्सा लगायत क्षेत्रय् चक्काजाम याःगु दु । चक्कजामं यानाः अनया सवारी साधन बन्द जूगु दुसाः जनजीवनं प्रभावित जूगु दु ।
