दक्वं योग्य लडाकुया सामूहिक समायोजन : भट्टराई
एनेकपा (माओवादी)या उपाध्यक्ष डा. बाबुराम भट्टराईं अनमिनं प्रमाणित या:पिं दक्वं झिंगुद्वं लडाकुत समायोजन जुइमाःगु खँ धयादीगु दु । वय्कलं दक्वं योग्य लडाकुया सामूहिक समायोजन जुइमाःगु मखुसाः न्हूगु संविधान जारी जुइमफइगु धयादिल ।
बिहीवाः पोखरा विमानस्थलय् पत्रकारत नाप खँल्हाबंला यानादिसें नेता भट्टराईं सेना समायोजन हे शान्ति प्रकृयाया मू खँ जूगु धयादिसें समायोजन बिना न्हूगु संविधान व शान्ति प्रकृया पूवनेमफइगु दाबी यानादिल ।
वय्कलं नेपाली सेनां पीखुद्वं सेनायात अप्वयेकाः गुइन्याद्वं दयेकूगु धयादिसें आः झिंगुद्वं लडाकु समायोजन छाय् यायेमफइगु धकाः न्ह्यसः तयादिल । वय्कलं पीखुद्वं नेपाली सेना म्हो यायेगु खःसा माओवादी नं लडाकु म्हो यायेत तयार जूगु धयादिल ।
नेता भट्टराईं राष्ट्रपतिया असंवैधानिक पलाः व छुंछुं मन्त्रीतय् आडय् सेना समायोजन व संविधान निर्माण प्रकृया स्यंकेगु कुतः जुयाच्वंगु द्वपं बियादिल । वय्कलं माओवादीं युद्ध चाहेमजूगु स्पष्ट यानादिसें सेना समायोजन व संविधान निर्माण सफल यायेत माओवादी लिप्पांगु ई तक लगेजुयाच्वनीगु धयादिल ।
