माओवादीनाप सत्ता सहकार्य प्रति कांग्रेस नेतात असन्तुष्ट
एनेकपा (माओवादीं) न्हापा न्ह्यवलय् नं कांग्रेसयात धोका बियावःगु धासें कांग्रेस नेतातय्सं माओवादी नाप सत्ता साझेदारी याःसा दुर्भाग्यपूर्ण जुइगु ख्याच्वः ब्यूगु दु ।
बिहीवाः कांग्रेसया मू ज्याकू सानेपाय् छगू पत्रकार सम्मेलन यानाः कांग्रेसया नेतातय्सं सत्ता प्राप्तिया निंतिं माओवादीनाप सहकार्य यायेमज्यूगु खँ धासें आःया ई न्हूगु संविधान व शान्ति प्रकृयाय् ध्यान बीमाःगु तर राजनीतिक दलतय् ध्यान उखे पाखे मवंगु प्रति दुखः प्वंकूगु दु । नेतातय्सं इलय् हे संविधान जारी यायेमफुसाः व शान्ति प्रकृयायात निष्कर्षय् थ्यंकेमफुसाः दलतय् नेतृत्वया औचित्य समाप्त जुइगु ख्याच्वः नं ब्यूगु दु ।
कांग्रेस महामन्त्री केबी गुरुङ, गोविन्दराज जोशी, बिनयध्वज चन्द, लक्ष्मणप्रसाद घिमिरे लगायत नेतात दुथ्याःगु उगु पत्रकार सम्मेलनय् नेतातय्सं कांग्रेस पाखें सरकारय् दुथ्यापिं मन्त्रीतय् ज्याखँ प्रति नं असन्तुष्टि प्वंकूगु दु । उमिसं पार्टीया महाधिवेशन जेठ १४ गते स्वयां न्ह्यः यायेमाःगु खँय् बः ब्यूगु दु ।
