संयन्त्रया बैठकय् राज्य पुर्नसंरचना आयोग बारे विवाद
बुधवाः च्वंगु स्वंगू प्रमुख दलया उच्चस्तरीय राजनीतिक संयन्त्रया बैठकय् राज्य पुर्नसंरचनाया कार्यदेशया बारे विवाद जूगु दु । बैठकय् कांग्रेस व एमालेया नेतातय्सं दक्वं विषयल् सुझाव बीफइगु कथं आयोगया गठन जुइमाःगु बिचाः प्वंकूगु खःसा माओवादी संविधानसभाया कार्यक्षेत्रय् हस्तक्षेप मजुइगु कथं प्राविधिक विषयलय् जक सुझाव बीगु कथंया आयोग गठन जुइमाःगु अडान कायेवं बुधवाःया बैठक बिनाः निष्कर्ष क्वचाःगु खः ।
बैठकय् प्रमुख राजनीतिक विषयलय् सहलह जुसां राज्या पुर्नसंरचनाया बारे अप्वः सहलह जूगु खः । संविधानसभाया राज्य पुर्नसंरचना समितिं थीथी झिंप्यंगू राज्यया खाका न्ह्ब्वयेवं उकी असहमति प्वंकूसें कांग्रेस व एमालें आयोग गठन यायेमाःगु माग यानावयाच्वंगु खः । माओवादीं धाःसाः आः वयाः आयोग गठनया औचित्य मदुगु व आः आयोग दयेकूसाः इलय् हे संविधान निर्माण मजुइगु व संविधानसभाया कार्यक्षेतय् हस्तक्षेप जुइगु खँ धयाच्वंगु दु ।
बैठक लिपाः माओवादी उपाध्यक्ष नारायणकाजी श्रेष्ठ 'प्रकाशं' राज्य पुर्नसंरचना समितिं प्रस्ताव याःगु खाकाय् संविधानसभा दुने सहलह जुयाच्वंगुलिं आः संविधानसभाया कार्यक्षेत्रय् असर मलाइगु कथं प्राविधिक विषयलय् सुझाव बीकथं आयोग गठन यायेमाःगु खँ बैठकय् थःपिंसं तयाःगु कनादिल ।
अथेहे कांग्रेस संसदीय दलया नेता रामचन्द्र पौडेलं आयोग गठन यानाः राज्यया पुर्नसंरचना यायेगु धइगु विषयलय् सहमति जूगु तरा थुकीया कार्यदेशय् सहमति जुइमफुगु कनादिल ।
