दण्डहीनताया अन्त्य याः : आयोग

राष्ट्रिय मानवअधिकार आयोगं देय्या थीथी थासय् जुयाच्वंगु हत्या व आक्रमणया घटना प्रति सरकारया ध्यानाकर्षण याकूगु दु ।

बुधवाः अयोगया सचिव विशाल खनालं छगू विज्ञप्तिइ पिथनादिसें दण्डहीनताया अन्त्य यायेत, शान्ति सुरक्षा बहाली यायेत व अप्वयाच्वंगु नागरिक असुरक्षा, हत्या, हिंसाया घटना दिकेत सरकार नाप इनाप याःगु दु ।

विज्ञप्तिइ जनकपुरय् संचार उद्यमी अरुण सिंहानियाया हत्याया लिप्पांगु घटनां शान्ति सुरक्षाया अवस्था सुदृढ यायेत व निर्वाध रुपय् अभिव्यक्ति स्वतन्त्रताया उपभोगया वातावरण निर्माण यायेत सरकारया प्रतिवद्धता कार्यान्वयन मजूगु खँ न्ह्यथंनातःगु दु ।

अथेहे विज्ञप्तिइ सुर्खेतय् माओवादीया भातृ संगठन वाईसीएलया कार्यकर्ता आशारम सुनार व जकपुरय् संचार उद्यमी सिंहानियाया हत्याया अनुगमन आयोगं यानाच्वंगु खँ धाःगु दु ।